गुथी ब्वनेकुथिको कोषका निम्ति सिड्नीमा च्यारिटी डिनर हुँदै

डा. राजु मानन्धरद्वारा,सिड्नी, /आज शनिबार सिड्नीमा गुथी ब्वनेकुथिको कोष निर्माण सहयोगको लागि च्यारिटी डिनर आयोजना गर्दैछ। अष्ट्रेलियामा नेपाल भाषा साहित्य कला संस्कृतिमा अग्रणी भूमिका खेल्दै आएको अष्ट्रेलियाको पुरानो संस्थामध्ये एक गुथी अष्ट्रेलिया अन्तरगत बनेको यस गुथी ब्वनेकुथी हालै अष्ट्रेलिया सरकारमा दर्ता भई भाषा कक्षा संचालन गर्दै आएको भाषा संस्कृति विद्यालयको रूपमा स्थापित सामुदायिक संस्था हो ।
यस संस्थाले सबै सामुदायिक संस्थाहरू, सामुदायिक सदस्यहरू, र शुभेच्छुकहरूलाई गुथि ब्वोनगुथि (नेपालभाषा भाषा विद्यालय) का लागि कोष संकलन गर्न खाना र मनोरञ्जनको साँझमा सामेल हुन अपील गरेको थियो ।
गुथि अस्ट्रेलियाका अध्यक्ष उमेश नापितले यस कार्यक्रम बारे जानकारी दिंदै भने “गुथि अस्ट्रेलियाको तर्फबाट, म सबैलाई चन्दा संकलन कार्यक्रममा भाग लिन अनुरोध गर्न चाहन्छु। हामी प्रायोजक, मिडिया, सामुदायिक संस्थाहरू, र सामुदायिक सदस्यहरूलाई अन्तिम तयारीको लागि सकारात्मक योगदान पुर्‍याउनु भएकोमा साँच्चै आभारी छौं।
अध्यक्ष नापितका अनुसार कार्यक्रममा प्रमुख अतिथिको रूपमा अस्ट्रेलियाका लागि नेपालका राजदूत महामहिम कैलाशराज पोखरेल, अनि विशेष अतिथिका रूपमा क्यान्टरबरीका सांसद, औद्योगिक सम्बन्ध मन्त्री, कार्य स्वास्थ्य र सुरक्षा मन्त्री, सोफी कोट्सिस यस कार्यक्रममा सहभागी हुनेछन् । प्रतिष्ठित स्थानीय नेताहरू र सामुदायिक अभियन्ताहरुको पनि सहभागिता रहने जनाइएको छ ।
गुथि अस्ट्रेलियाका संस्थापक सदस्य र वरिष्ठ सामुदायिक अभियन्ता पदम शाक्यले यस अभियानको दीर्घजीवनको कामना गर्दै भने , “हामी सबै समुदायका नेताहरू र सदस्यहरूलाई गुथि अस्ट्रेलियाको चन्दा संकलन डिनरमा स्वागत गर्न पाउँदा अत्यन्त उत्साहित छौं। हामी सबै उदार प्रायोजकहरू, सरोकारवालाहरू, र सम्पूर्ण नेपाली समुदायलाई यस महान उद्देश्य प्राप्त गर्न समर्थन र सहयोग गरिदिनुभएकोमा आभारी छौं। सामुदायिक सहयोग र सार्थक र उद्देश्यपूर्ण सामुदायिक अभियानले गति पाउने आशा राख्दछु ।”
गुथि अस्ट्रेलियाका सदस्य तथा गुथि ब्वनेकुथिका संयोजक श्याम सैंजूले यो कार्यक्रम गुथि ब्वनेकुथि (नेपालभाषा भाषा विद्यालय) लाई सहयोग र सहायता प्रदान गर्न आयोजित गरिएको बताउँदै हाल यहाँ १४ विद्यार्थीहरू अध्ययन गरिरहेको बताए । गुथि अस्ट्रेलियाका पूर्व अध्यक्ष दीप्त श्रेष्ठ  गुथि ब्वनेकुथिका अध्यक्षका रूपमा रहेका छन् ।
कार्यक्रममा ठूलो संख्यामा सहभागीहरू आउने अपेक्षा गरिएको छ।