बाघभैरबया भजनया म्युजिक भिडियो पिदन

यें/ केपू देयया आजुद्यः बाघभैरबया महिमायात कया: दयेकात:गु   “जय जय बाघभैरब ” भजनया भिडियो विमोचन जूगु दु । केपूया किर्तिपुर सिनेप्लेक्सय् उगु भिडियोया पितब्वज्या जूगु खः ।
उगु भजनय् बाघभैरबया महिमा गानया नापनापं बाघभैरब उत्पत्ति बारे प्रचलित जनश्रुतिया किम्बदन्तियात  बाल कलाकारपिंपाखें न्ह्यब्वयातगु भिडियोया निर्देशन ललेन्द्र शाक्यं यानादीगु खः ।
बाघभैरब भजन मण्डलया दुजःपिनिगु स: बियात:गु थुगु  भजनयात संगीतकार हरिशरण सायमिं संगीत संयोजन याना तयार यानादीगु खः । अथेहेतुं थुकिया भिडियो निर्माणया संयोजन नं हरिशरण सायमिं हे यानादीगु खः ।
सोमबार जूगु थ्व भिडियो पितब्वज्या ज्याझ्वः जनकवि दुर्गालाल श्रेष्ठ मूपाहाँसुइ जूगु खःसा हरिशरण सायमिया सभानायसुइ जूगु खः । मूपाहाँ श्रेष्ठं त्वादेवाय् मत च्याका ज्याझ्वःया उलेज्या यानादीगु खः । ज्याझ्वलय् किर्तिपुर नगरपालिकाया उपमेयर शुभलक्ष्मी शाक्य, नेपालभाषाया न्हापांम्ह म्युजिक भिडियो निर्देशक विजयरत्न असंबरे व बाघभैरब भजन मण्डलया गुरु जोगमान महर्जन लगायत बिशेष पाहाँ कथं झायादिसे बाघभैरब व म्युजिक भिडियो बारे नुगःखँ तयादीगु खः ।