बुद्ध धर्ममा पिएचडी गर्ने पहिलो भिक्षुनी डा. अनोजा गुरुमांको निधन

बालिका अवस्था

काठमाडौं / नेपालको थेरबाद बुद्ध धर्ममा महत्वपूर्ण योगदान गर्नु भएका सुलक्षणकीर्ति बिहार प्रमुख डा.अनोजा गुरुमां दिवंगत हुनुभएको छ ।
सुलक्षणकीर्ति बिहारले जानकारी गराए अनुसार उहाँ आज जेष्ठ ३ गते बिहान १:२२ बजे दिवंगत हुनुभएको हो ।
बिहारले यस दुखद समाचार सुनाउनु पर्दा दुःख र मर्माहत भएको र उहाँका अनन्त गुणहरु स्मरण गर्दै भाव विह्वल हुँदै उहाँप्रति हार्दिक श्रद्वांजली अर्पण गर्दै निर्वाणको कामना गर्दछ भनी शोक विज्ञप्ति प्रकाशित गरेको छ ।
सुलक्षण कीर्ति बिहार परिवार चौभार कीर्तिपुरका संस्थापक , बृद्ध होस्टेल ,अस्पताल र बौद्ध अध्ययन गर्ने क्याम्पसको परिकल्पना गरेका उहाँ बुद्ध धर्ममा पिएचडी गर्ने पहिलो गुरुमां हुनुहुन्छ ।
वि.सं. २०१७ श्रावण २ गते बनेपाको वाँख्यः टोलमा हरिनारायण मानन्धर व रत्नमाया मानन्धरका माहिली सुपुत्रीका रुपमा जन्म भएका शारदा मानन्धरले बि.सं.२०२७ मंसिर १ गते बनारसमा अनागारिका अनोजा (खेमा)को नाममा प्रव्रजित भइ गुरूमां बने । उहाँले बुद्ध शिक्षाको अध्ययन बर्मा र भारतमा गर्नुभयो । धर्म अध्ययनका क्रममा सन् १९९९मा बनारसको सम्पूर्णानन्द संस्कृत विश्वविद्यालयबाट “अभिधम्मावतारपुराणटीका, अभिनवटीकायाःसम्पादनं आलोचनात्मकंचाध्ययनम्ः” विषयमा विद्यावारिधि गर्नुभयो ।
यसपछि उहाँले सुलक्षणकीर्ति बिहारमा धर्म अभ्यास ,प्रचार प्रसार  र शिक्षामा लाग्नुभयो ।योसँगै उहाँले समाजसेवामा पनि पाइला अगाडी बढाउनु भयो ।
अस्वस्थताका कारण दुई वर्षदेखि उहाँ नेपाल र भारतको नयाँ दिल्लीमा स्वास्थ्य उपचार गराउँदै आउनुभएको थियो ।

गुरुमांको छोटो जीवनी यस भिडियो मार्फत प्रस्तुत गरी गुणानुस्मरण गर्दै निर्वाण कामना गर्दछौं ।