वन्दना राणाको ‘शिव ताण्डव’सार्वजनिक

प्रसिद्ध उद्योगपति तथा नेपाल उद्योग वाणिज्य महासंघकी पूर्व अध्यक्ष वन्दना राणाको विशेष पहलमा निर्माण गरिएको आध्यात्मिक एवं सांस्कृतिक महत्व बोकेको ‘शिव ताण्डव’ म्युजिक भिडियो आइतबार ललितपुरस्थित पाटन संग्रहालय परिसरमा आयोजित एक विशेष समारोहबीच सार्वजनिक गरिएको छ।
कार्यक्रमका प्रमुख अतिथि नेपालका लागि भारतीय राजदूत नवीन श्रीवास्तवले ‘शिव ताण्डव’ म्युजिक भिडियोको औपचारिक विमोचन गरेका हुन्। समारोहमा ललितपुर महानगरपालिकाका प्रमुख चिरीबाबु महर्जन, गैरआवासीय नेपाली संघ (एनआरएनए) का पूर्व अध्यक्ष उपेन्द्र महतो, विभिन्न क्षेत्रका विशिष्ट व्यक्तित्व, कलाकार, उद्योगी–व्यवसायी, कूटनीतिज्ञ तथा संगीतप्रेमीहरूको उल्लेखनीय उपस्थिति रहेको थियो।
पाटन दरबार क्षेत्रको ऐतिहासिक एवं सांस्कृतिक वातावरणबीच सम्पन्न कार्यक्रममा वक्ताहरूले ‘शिव ताण्डव’ले नेपाली कला, संगीत र आध्यात्मिक परम्परालाई अन्तर्राष्ट्रिय स्तरमा प्रवर्द्धन गर्न महत्वपूर्ण योगदान पुर्‍याउने विश्वास व्यक्त गरेका थिए। कार्यक्रममा म्युजिक भिडियो निर्माणको अवधारणा, यसको सांस्कृतिक सन्देश तथा कलात्मक पक्षबारे समेत चर्चा गरिएको थियो।
भव्य समारोहबीच सार्वजनिक गरिएको ‘शिव ताण्डव’ म्युजिक भिडियोले भगवान शिवको ताण्डव स्वरूप, वैदिक दर्शन तथा सनातन संस्कृतिको गहिरो भावलाई आधुनिक प्रस्तुति र उत्कृष्ट दृश्य संयोजनमार्फत दर्शकसमक्ष प्रस्तुत गरेको निर्माण पक्षले जनाएको छ।