‘शान्तिका लागि साइकल यात्रा’: काठमाडौंदेखि लुम्बिनीसम्म १०८ यात्रीहरू सहभागी हुने

काठमाडौं । विश्वभर बढ्दो द्वन्द्व, युद्ध र अस्थिरताका बीच शान्ति, करुणा र सहअस्तित्वको ऊर्जा छर्न ‘शान्तिका लागि साइकल यात्रा’ आयोजना हुने भएको छ। महासिद्ध युनिभर्सल पिस स्यान्क्चुअरीको आयोजनामा वैशाख १५ गते काठमाडौंबाट सुरु हुने यो यात्रा बुद्ध पूर्णिमाको दिन पवित्र भूमि लुम्बिनी पुगेर सम्पन्न हुनेछ।

भगवान गौतम बुद्धको २५७०औँ जन्मजयन्तीको अवसर पारेर आयोजना गर्न लागिएको यस यात्रामा १०८ जना प्रतिबद्ध साइकल यात्रीहरू सहभागी हुनेछन्।

चार दिने यात्राको कार्यतालिका

स्वयम्भूबाट सुरु हुने यो यात्रा चार दिनको कठिन तर आध्यात्मिक रूपले प्रेरणादायी हुने आयोजकले जनाएको छ:

• पहिलो दिन (वैशाख १५): काठमाडौंबाट हेटौंडा।

• दोस्रो दिन: हेटौंडाबाट नारायणघाट हुँदै नवलपुरको रजहर।

• तेस्रो दिन: कावासोती, दाउन्ने र बर्दघाट हुँदै भैरहवा।

• चौथो दिन (बुद्ध पूर्णिमा): भैरहवाबाट लुम्बिनी प्रवेश र समापन।

लुम्बिनीमा विशेष समारोह र पुस्तक विमोचन

साइकल यात्राको समापनसँगै वैशाख १८ (मे १) मा लुम्बिनीमा भव्य कार्यक्रम हुनेछ। जहाँ हजारौँ श्रद्धालुहरूको उपस्थितिमा मायादेवी मन्दिरको दर्शन, बोधिवृक्षमुनि सामूहिक ध्यान र विश्व शान्तिका लागि दीप प्रज्वलन गरिनेछ।

वैशाख १९ (मे २) मा विशेष ध्यान कार्यक्रमका साथै श्याल्पा तेनजिन रिन्पोछेद्वारा लिखित पुस्तक ‘द पाथ टू पर्फेक्ट फ्रिडम’ (पूर्ण मुक्तिको मार्ग) को नेपाली अनुवाद सार्वजनिक गरिने कार्यक्रम छ। रिन्पोछेले विगत चार दशकदेखि संयुक्त राष्ट्र संघ र वर्ल्ड ईकोनमिक फोरम जस्ता अन्तर्राष्ट्रिय मञ्चहरूमा बुद्ध र लुम्बिनीको सन्देश प्रवाह गर्दै आउनुभएको छ।

पर्यावरण र मानवताको आवाज

यो यात्रा केवल खेलकुद वा पर्यटकीय गतिविधि मात्र नभई ‘गोइङ ग्रिन’ (Going Green) अवधारणामा आधारित रहनेछ। कार्बन उत्सर्जन घटाउने र वातावरण संरक्षणको सन्देश दिँदै प्रत्येक पैडलसँगै आन्तरिक शान्ति र पर्यावरणको चेतना फैलाउने लक्ष्य राखिएको छ।

आयोजकका अनुसार यस ऐतिहासिक अभियानले नेपाललाई पुनः विश्व शान्तिको केन्द्रका रूपमा स्थापित गर्न मद्दत पुग्नेछ। कार्यक्रमलाई नेपाल पर्यटन बोर्डले समर्थन गरेको छ भने एनसेल (Ncell) ले प्रायोजन गरेको छ। समापन समारोहमा सम्माननीय प्रधानमन्त्री, पर्यटन मन्त्री र विभिन्न धार्मिक तथा सामाजिक व्यक्तित्वहरूको उपस्थिति रहनेछ।

रिन्पोछेको आह्वान: “शान्तिलाई युद्धभन्दा शक्तिशाली बनाऔँ”

अभियानबारे बोल्दै श्याल्पा तेनजिन रिन्पोछेले सबैलाई यस महान कार्यमा सहभागी हुन आह्वान गर्नुभएको छ। उहाँले भन्नुभएको छ— “आउनुहोस्, हामी शान्तिलाई युद्धभन्दा अझ शक्तिशाली र आकर्षक बनाऔं।”

साइकल यात्राले बुद्धको शिक्षालाई व्यवहारमा उतार्ने र विश्वभरका मानिसहरूलाई करुणा र सहअस्तित्वको मार्गमा हिँड्न प्रेरित गर्ने विश्वास लिइएको छ।