पोखरामा भक्तपुरको झल्को दिने गरी ‘बिस्केट जात्रा’

पोखरा, ३ बैशाख । पोखरा नगरको जग बसाल्ने र यहाँको व्यापारिक तथा सांस्कृतिक इतिहास जोगाउने नेवार समुदायले यस वर्ष पनि भक्तपुरको झल्को दिने गरी ‘बिस्केट जात्रा’ भव्यताका साथ सम्पन्न गरेका छन्। पोखराको पुरानो बस्ती गणेश टोलमा वि.सं. २०८३ बैशाख १ गतेदेखि सुरु भएको यो ऐतिहासिक जात्रा सोमबार विशेष रथ (खत) यात्रा र सिन्दुर जात्रासहित समापन गरिएको हो।

पोखराको जग र भक्तपुरसँगको साइनो

पोखराको सहरीकरण र बजार स्थापनामा भक्तपुरबाट आएका नेवार समुदायको मुख्य योगदान रहेको इतिहास छ। नेवा: खल कास्कीका अध्यक्ष अशोक पालिखेका अनुसार, पोखरामा बसोबास गर्ने बहुसंख्यक नेवारहरूका पुर्खा भक्तपुरबाटै आएका हुन्।

“पोखरामा बस्ने ९५ प्रतिशतभन्दा बढी नेवारहरू भक्तपुरबाट आउनुभएको हो,” पालिखे भन्नुहुन्छ, “त्यसैले हामीले आफ्ना पुर्खाको संस्कार र भक्तपुरकै बिरासतलाई निरन्तरता दिँदै यहाँको गणेश मन्दिरमा बिस्केट जात्रा मनाउँदै आएका छौँ। यो केवल जात्रा मात्र नभई पोखराको स्थापना गर्ने समूहको गौरवमय पहिचान पनि हो।”

हिन्दू परम्परा अनुसार कुनै पनि शुभ कार्य अघि गणेशको पूजा गरिने भएकाले नयाँ वर्षको सुरुवातमा सुख, शान्ति र समृद्धिको कामना गर्दै यो जात्रा मनाइन्छ। विगत तीन वर्षदेखि यसलाई अझै उत्साहजनक बनाउन ‘सिन्दुर जात्रा’ को स्वरूप दिइएको छ, जहाँ स्थानीयहरूले हर्षोल्लासका साथ अबिर खेलेर खुसी साटासाट गर्छन्।

बैशाख १ गते बिहान गणेशको मूर्तिलाई मन्दिरबाट बाहिर निकालेर ‘सितल पाटी’ मा विशेष पूजा गरिएको थियो। त्यसपश्चात् रथलाई नगरका ऐतिहासिक र पुराना क्षेत्रहरू:

• बागबजार, तेर्सापट्टि र नदीपुर

• महेन्द्रपुल (लाबाजुहरूको क्षेत्र)

• नालामुख हुँदै सिमलचौर (रेडक्रस भवन अगाडि)

यी क्षेत्रहरूको परिक्रमा गराएपछि रथलाई पुनः गणेश मन्दिरमा तीन पटक घुमाएर भित्र भित्र्याइएको थियो। जात्रामा नेवा: खल, नेवा: मिसा पुच:, नेवा: पत्रकार पुच: लगायत विभिन्न सांस्कृतिक टोलीहरूको सक्रिय सहभागिता रहेको थियो।