एनपीपीए (NPPA) अध्यक्षमा शान्ति श्रेष्ठ निर्वाचित

मेरिल्याण्ड,युएसए /अमेरिकामा रहेका नेवार समुदायले स्थापना गरेको संस्था नेपाः पासा पुचः अमेरिकाय् (NPPA) को नयाँ अध्यक्ष पदमा शान्ति श्रेष्ठ निर्वाचित हुनुभएको छ।

नेपाल संवत् ११४६ को नयाँ वर्षको उपलक्ष्यमा आयोजित संस्थाको ३५ औँ वार्षिक साधारणसभाले श्रेष्ठलाई नयाँ अध्यक्षमा चयन गरेको हो।

साधारणसभामा उहाँको नाम घोषणा भएपछि उहाँले आफ्नो स्वीकृति मन्तव्य दिँदै आगामी कार्यकालमा गर्ने कार्ययोजनाबारे जानकारी गराउनुभएको थियो। यससँगै, निवर्तमान अध्यक्ष मनोहर श्रेष्ठ पदमुक्त हुनुभएको छ। मनोहर श्रेष्ठ हाल विश्व नेवाः संगठन (WNO) को अध्यक्ष हुनुहुन्छ।

नयाँ कार्यसमितिमा को-को?

साधारणसभाले नयाँ कार्यसमितिका अन्य पदाधिकारीहरूलाई पनि चयन गरेको छ:

• प्रथम उपाध्यक्ष: सुमन तुलाधर
• द्वितीय उपाध्यक्ष: प्रविन ताम्राकार
• महासचिव: समिप श्रेष्ठ
• कोषाध्यक्ष: रमिता महर्जन

मनोनित सदस्यहरू:

• डा. राजु तमोट
• मगन श्रेष्ठ
• जयश्वर श्रेष्ठ
• कञ्चन खावुन्जु
• सबिना सुवाल
• प्रतिना श्रेष्ठ शाक्य
• सन्ध्या महर्जन
• सुदीप मुज्याजु

 संस्थाको इतिहास र नवनिर्वाचित अध्यक्ष

नेपाः पासा पुचः अमेरिकाय् (NPPA) नेपालबाहिर नेवार समुदायले गठन गरेको पहिलो नेवाः संस्था हो। यो संस्था आजभन्दा ३५ वर्षअघि भाषासेवी राम मालाकारको नेतृत्वमा स्थापना भएको थियो।

नवनिर्वाचित अध्यक्ष शान्ति श्रेष्ठ सोही संस्थापक राम मालाकारकी सुपुत्री हुनुहुन्छ। NPPA को विभिन्न पदमा रहेर लामो समयदेखि सक्रिय रहँदै आउनुभएकी श्रेष्ठले अब अध्यक्षको रूपमा संस्थालाई थप गति प्रदान गर्ने विश्वास गरिएको छ। उहाँ अमेरिकामै रहेका अन्य नेपाली संस्थाहरूमा पनि आबद्ध हुनुहुन्छ।

समारोह र विमोचन

अमेरिकाको मेरिल्याण्डस्थित गेथर्सवर्ग शहरमा आयोजित उक्त समारोहमा अमेरिकाका लागि नेपाली राजदूतावासका प्रतिनिधि युगराज पाण्डे, तुलसी महर्जन लगायतका पाहुनाहरूले शंखधर साख्वाःको तस्बिरमा माल्यार्पण गर्नुभएको थियो। सोही कार्यक्रममा संस्थाको ‘दबू’ नामक पत्रिका/मुखपृष्ठ (ख्वाःपौ) समेत विमोचन गरिएको छ ।