संकिपा राष्ट्रिय दबूद्वारा स्वागत तथा शुभकामना आदानप्रदान

कार्यक्रममा स्वागत गरिएका गुथी अष्ट्रेलियाका निवर्तमान अध्यक्ष उमेश नापितले गुथी अष्ट्रेलियाले नेवाः भाषा, संस्कृति र तजिलजीको प्रवर्द्धनका लागि भइरहेका कार्यहरूको जानकारी दिए।  उनले संस्थाका अग्रज र कार्यसमितिको प्रयासबाट गुथी ब्वनेकुथी (अध्ययन केन्द्र) नेपाल  भाषा स्कुलसमेत सञ्चालन गर्न सफल भएको र त्यसमा भाषा, धिमे बाजा तथा नृत्यका कक्षाहरू नियमित भइरहेको बताए । गुथी अष्ट्रेलिया सन् ९० को दशकमा स्थापित भई सन् २००९ देखि सरकारी निकायमा विधिवत् दर्ता भएर चलिरहेको अष्टेलियामा रहेको  पुरानो नेपाली संस्था हो।

प्रमुख अतिथि नेवाः देय् दबूका अध्यक्ष पवित्र बज्राचार्यले नेवाः समुदायमा आपसमा वैमनस्यता नराखी मिलेर, विचारविमर्श गरेर काम गर्न सके राम्रो हुने सुझाव दिए । वर्ल्ड नेवाः अर्गनाइजेसनका निवर्तमान केन्द्रीय उपाध्यक्ष शाक्य सुरेनले प्रवास (डायस्पोरा) मा रहेका नेवाःहरूको अवस्थाबारे प्रकाश पारे ।

नेवाः संकिपा राष्ट्रिय दबूंका अध्यक्ष महर्जन रत्नले निवर्तमान अध्यक्ष उमेश नापितलाई संस्थाको तर्फबाट सम्मान पत्र हस्तान्तरण गरेका थिए। उनले गुथी अष्ट्रेलियासँग सहकार्य गरेर नेवार चलचित्रलाई प्रवर्द्धन गर्न सकिने बताउँदै यसका निम्ति छलफल भइरहेको बताए ।स्मरणीय छ हालैमात्र गुथी अष्ट्रेलियाले सिड्नीमा नेपाल भाषाको चलचित्र “ख्या वल”को च्यारिटी शो गरेका थियो।

कार्यक्रममा आयोजक संस्थाका सल्लाहकार वरिष्ठ चलचित्र सम्पादक माणिक रत्न तुलाधर , मानर्थ सदस्य विकासित रिष्ठ कलाकारहरू नारायणदेवी प्रधान, अन्नपूर्णेश्वरी श्रेष्ठ, भीमसेन रिसाल, रञ्जु श्रेष्ठ, श्यामप्रसाद खड्गी, लेखक राजेन मानन्धर लगायतका विशिष्ट व्यक्तित्वहरूको सहभागिता रहेको थियो।