येंया:(इन्द्रजात्रा)को साइत सार्वजनिक, जात्राको सुरुदेखी समापनसम्मको तालिका यस्तो छ

योसिंगुँमा योसिं बनाउदै गरेको

काठमाडौँ/काठमाडौँको ऐतिहासिक पर्व येंया:(इन्द्रजात्रा)को साइत सार्वजनिक भएको छ। नेपाल पञ्चाङ्ग निर्णायक विकास समितिले आजदेखि सुरु भई १७ दिनसम्म चल्ने जात्राको सम्पूर्ण तालिका घोषणा गरेको हो।
जात्राको मुख्य दिन,योसिं थनेगु(इन्द्रध्वजोत्थान)साइत भदौ १९ गते बिहीबार बिहान १०:३१ बजेका लागि तोकिएको छ। योसिं उठाइसकेपछि एंया: जात्रा सुरु भएको मानिन्छ ।
समितिका अनुसार जात्रा आज भदौ ९ गते बिहान बनयात्रासँगै सुरु भइसकेको छ भने आजै राति ९:०३ बजे योसिं(इन्द्रध्वज)का लागि रूख काट्ने साइत रहेको छ।
यस्तो छ जात्राको पूरा तालिका:
भदौ १५, आइतबार: काटिएको याेसिंलाई भोटाहिटीबाट नगर प्रवेश गराइने।
भदौ १९, बिहीबार: बिहान १०:३१ बजे हनुमानढोकामा याेसिं थनेगु(इन्द्रध्वजोत्थान) ।
भदौ २१, शनिबार (मुख्य दिन): राष्ट्राध्यक्षको उपस्थितिमा कुमारी रथयात्रा (तल्लो टोल)।
भदौ २२, आइतबार: माथिल्लो टोलमा रथयात्रा।
भदौ २६, बिहीबार: नानिचा यात्रा र राति १०:३२ बजे योसिं क्वथलेगु(इन्द्रध्वज ढाल्ने) ।
यस वर्ष समितिमा पदाधिकारी रिक्त रहेकाले साइत संस्कृति, पर्यटन तथा नागरिक उड्डयन मन्त्रालयमार्फत सार्वजनिक गरिएको हो। भाद्र शुक्ल द्वितीयादेखि सुरु भएको जात्राको समापन आश्विन कृष्ण चतुर्थीमा याेसिं ढालेपछि हुनेछ, जसमा राष्ट्रपतिले कुमारीको हातबाट टीका ग्रहण गर्ने परम्परा छ।