ज्यापू संस्कृति विकास कोषपाखें गुरुपिं मंकाःरुपं हन

यें/गुरुपिन्त हनावना याना थःगु ज्ञानयात तव्याः याना वनाच्वनेमा धकाः परम्परानिसें गुरुपिन्त हनावना तयाः गुरु हनेज्या याना शिष्यया धर्म निर्वाह याना वयाच्वंगु दु । नेपाःसा संस्कृेति, संगीतयात जीवन्तता बिया तयत गुरुपिन्सं थःगु बुद्धि विवेक छ्यला याना वयाच्वंगु योगदानयात कःघाना हे थुकथं गुरु पुजा याना वयाच्वंगु दु ।

थ्वहे झ्वलय् गुरुपुन्हिया दिनय् ज्यापुतय् परम्परागत ख्वीस्वंगू त्वाःया बाजं गुरुपिन्त क्षेत्रपाटी पार्टी प्यालेसय् २०८२ साल असार २६ गते विहिवाः गते मंकाः गुरु हनेज्या याःगु दु । ज्यापु संस्कृति विकास कोषया ग्वसालय् थुकथं तःजिगु समारोह याना बाजं गुरुपिंत हाकुतपुलिं पुइकाः ख्येँ सगं बियाः हनेज्या याःगु खः ।

येँ महानगरपालिकाया उपमेयर सुनिता डंगोलं बाजंगुरुपिंत हाकु तपुलिं पुइकाः कोषया नायः मंगलकृष्ण सिंह स्वांमाः क्वखाय्काः गुरुपिन्त हनावना तयाः हनादीगु खः । उगु तःजिगु गुरु हना ज्याझ्वलय् खुइस्वंगू त्वाःया त्वाः न्यायो व कजिपिंत नं स्वांमाः क्वखाय्का ख्येँ सगं बियाः हनेज्या याःगु खः ।

थुगु हे ज्याझ्वलय् नीनिक्वःगु ज्यापु दिवस तःजिक हनेया निंतिं नरः त्वाः खलः ( हाडीगां ) या नायः कृष्ण बहादुर डंगोलयात पाःब्वः लःहानादीगु खः । उगु ज्याझ्वलय् पाःब्वः काःगु खलःयात कोषपाखें कोषया नायो मंगलकृष्ण सिंहं निगू लख दांया चेक नं लःल्हानादीगु खः । पाब्वः लःल्हाना काय् धुंका भाजु कृष्ण बहादुर डंगोलं नरः त्वाःया ऐतिहासिक गनं मदुगु जात्राया विशेषतायात कःघाना थःगु नुगः खँ तयादीगु खःसा वयकलं आः २२ क्वःगु ज्यापु दिवस न्यायकेत क्वातुक न्ह्याःवनेगु प्रतिवद्धता नं प्वंका ग्वहालि याय्त सकसितं इनाप नं यानादीगु खः ।

कोषया नायो मंगलकृष्ण सिंहया सभापतित्वय् उगु ज्याझ्वः जूगु खःसा उगु ज्याझ्वलय् कोषया न्वकु शन्त कुमार महर्जनं लसकुस न्वचु बियादीगु खः । थुकिया नापं वयकलं कोषया बारे नं खँ कनादीगु खः । वतुया नित्यनाथ वतु त्वाःया शान्त राज महर्जनं झीसं थःगु संस्कृति संरक्षण याना वनेत सचेत जुया न्ह्याःवनेमाःगु खँय् बः बियादीगु खः ।

उगु ज्याझ्वलय् मूपाहां येँ महानगर पालिकाया उपमेयर सुनिता डंगोल, येँ महानगरपालिकाया सम्पदा विभागया संयोजक व ८ वडाया अध्यक्ष आशामान संगत, ज्यापु महागुथिया नायो सत्य नारायण डंगोलपिन्सं ज्यापु विकास कोषया ज्याखँया लिसें ज्यापु दिवसया खँयात कःघाना थुकिया बिकास व ज्यापु तय्गु म्हसीकाया बिकास गथे याना वनेगु धैगु बारे नं थःथःगु नुगः खँ तयादीगु खः ।

मूपाहां उप प्रमुखपाखें त्वाः देवाय् मत च्याका ज्याझ्वःया उलेज्या याःगु खः । उगु ज्याझ्वः कोषया मूछ््याञ्जे रमेश महर्जनं न्ह्याकादीगु खः ।
थुगु ज्याझ्वलय् हाडीगांया मौलिकता कःघानातःगु जात्राया खः नं ब्वज्या यानातःगु खः ।

-सुगत रत्न सिन्दुराकार