नेपाल सङ्गीत तथा नाट्य राष्ट्रिय प्रज्ञा पुरस्कार प्रदान,

काठमाडौं, २०८१ असार ११ गते, बुधबार/नेपाल सङ्गीत तथा नाट्य प्रज्ञा-प्रतिष्ठानले आज राष्ट्रपति रामचन्द्र पौडेलका हातबाट वरिष्ठ गायक दीप श्रेष्ठलाई ‘नेपाल सङ्गीत तथा नाट्य दीर्घ साधना सम्मान-२०८१’ र आठ जना अन्य वरिष्ठ स्रष्टालाई ‘नेपाल सङ्गीत तथा नाट्य राष्ट्रिय प्रज्ञा-पुरस्कार-२०८१’ ले सम्मानित गरेको छ। बुधबार दिउँसो राष्ट्रपति भवन शीतल निवासमा एक कार्यक्रम आयोजना गरी सम्मान अर्पण गरियो।

पुरस्कार समर्पण गर्ने क्रममा राष्ट्रपति पौडेलले प्रज्ञा-प्रतिष्ठानद्वारा प्रदान गरिएको सम्मान स्रष्टाहरूको दीर्घकालीन साधना, समर्पण र सिर्जनशीलताको प्रतीक भएको बताए। उनले सङ्गीत र कलालाई केवल मनोरञ्जनको माध्यम मात्र नभई चेतना र संस्कारको संवाहकको रूपमा चित्रण गरे। सङ्गीत र नाट्यको माध्यमबाट संवेदनाको उजागर हुने, विचार सुसंस्कृत हुने र समाजलाई सकारात्मक रूपान्तरणको बाटोमा अग्रसर गराउने विचार पनि राष्ट्रपतिले व्यक्त गरे। नेपाल जातजाति र सामुदायिक विविधताले सम्पन्न भएकाले सांस्कृतिक र नाट्य रूपमा विश्व चिन्तनको एक केन्द्र बन्ने गरी राज्य अघि बढ्नुपर्नेमा पनि उनले जोड दिए।

समारोहका विशेष अतिथि संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेले पुरस्कृत स्रष्टाहरूलाई बधाई तथा शुभकामना दिए। उनले पुरस्कारले पुरस्कृत स्रष्टाहरूको विगतको योगदानको सम्मान गर्दै थप विकास र प्रगतिका लागि प्रेरित गर्ने र नयाँ पुस्तालाई सङ्गीत तथा नाट्य लगायतका अभौतिक संस्कृति हस्तान्तरण गर्दै प्रोत्साहित गर्ने पनि बताए। मन्त्री पाण्डेले प्रज्ञा-प्रतिष्ठानले प्रदान गरेको पुरस्कार सबै दृष्टिकोणबाट समावेशी भएकाले सिङ्गै राष्ट्र नै पुरस्कृत भएको अनुभूति व्यक्त गरे।

प्रज्ञा-प्रतिष्ठानका कुलपति निशा शर्मा पोखरेलले विविधतापूर्ण एकता नै नेपाली समाजको विशेषता भएकाले त्यसलाई सुदृढ गर्न र राष्ट्रिय एकता तथा अखण्डतालाई मजबुत बनाउन सांस्कृतिकर्मीको ठूलो भूमिका हुने बताइन्। कला-संस्कृतिका संवाहक कलाकर्मीलाई प्रोत्साहित गर्नु, दीर्घ साधक र स्रष्टाका योगदानलाई कदर गर्नु राज्यको दायित्त्व महसुस गरी प्रज्ञा-प्रतिष्ठानले २०७१ सालबाट स्रष्टाहरूलाई पुरस्कृत गर्ने परम्परा सुरु गरेको उनले स्मरण गराइन्। कुलपति शर्माले यसअघि ६ विधामा ६ जना स्रष्टालाई पुरस्कृत गर्दै आएकोमा यसै वर्षदेखि वाद्यवादन विधा र खोज अनुसन्धान विधामा एक-एक जना र सङ्गीत र नाट्य विधामा आजीवन योगदान दिने एक वरिष्ठ स्रष्टालाई ‘नेपाल सङ्गीत तथा नाट्य दीर्घ साधना सम्मान’ प्रदान गर्न थालिएको पनि स्पष्ट पारिन्।

कार्यक्रममा स्वागत मन्तव्य राख्दै प्रज्ञा-प्रतिष्ठानका उपकुलपति शम्भू राईले कलाकारको निरन्तर साधना र सृजनाले नै कलालाई जीवन्त बनाउने भएकाले कलाकारलाई सम्मान आवश्यक भएको बताए।

सम्मानित हुने स्रष्टाहरू

यस वर्षको ‘नेपाल सङ्गीत तथा नाट्य राष्ट्रिय प्रज्ञा-पुरस्कार-२०८१’ बाट सम्मानित हुनेहरूमा:

राष्ट्रिय प्रज्ञा-पुरस्कारको राशि एक लाख एक रुपैयाँ र ताम्रपत्र तथा दीर्घ साधना सम्मानको दुई लाख एक रुपैयाँ र ताम्रपत्र रहेको कार्यक्रमका सहजकर्ता तथा प्रज्ञा-प्रतिष्ठानका सदस्यसचिव कुश्मा महरा ‘प्रगति’ ले बताइन्।

कार्यक्रममा पुरस्कृत स्रष्टाका ताम्रपत्र प्राज्ञ परिषद् सदस्य र प्राज्ञसभा सदस्यबाट वाचन गरिएको थियो भने राष्ट्रपतिको आग्रहमा पुरस्कृत स्रष्टा कुन्ती मोक्तानले आफ्ना दुई गायिका छोरी सुवानी मोक्तान र शीतल मोक्तानका साथ ‘कोही भन्छन् जिन्दगी यो…’ बोलको गीत समेत मञ्चमा बेजोड रूपमा प्रस्तुत गरिन्।