धम्मवती गुरुमालाई म्यानमार सरकारबाट “महासद्धम्मजोतिकधज” उपाधि प्रदान

काठमाडौं/थेरवाद बौद्ध धर्मको प्रचार–प्रसारमा उल्लेखनीय योगदान पुर्‍याउँदै आउनुभएकी धम्मवती गुरुमालाई म्यानमार सरकारले “महासद्धम्मजोतिकधज” उपाधिले सम्मानित गरेको छ।

नेपाल संवत् ११४५ चौलागा अष्टमी (२०८२ वैशाख ८ गते) सोमबार, काठमाडौंस्थित धर्मकीर्ति विहार, श्रीघलमा आयोजित एक विशेष समारोहमा नेपालका लागि म्यानमारका राजदूतले गुरुमालाई सो उपाधि प्रदान गरिएको थियो।

म्यानमार सरकारले गुरुमाको थेरवाद बौद्ध धर्ममा पुर्‍याएको दीर्घकालीन र महत्वपूर्ण योगदानको कदर गर्दै यो उपाधि प्रदान गर्ने निर्णय गरेको हो।

कार्यक्रममा पूर्वमन्त्री तथा प्रतिनिधिसभा सदस्य कृष्णगोपाल श्रेष्ठले गुरुमालाई प्राप्त सम्मान नेपालका लागि गर्वको विषय भएको बताउँदै, म्यानमारका जनताले गुरुमालाई बुद्धको प्रतिनिधिका रूपमा स्वीकार गर्नु नेपाल-म्यानमारबीचको धार्मिक सम्बन्धको सशक्त प्रमाण भएको धारणा व्यक्त गर्नुभयो।

उक्त अवसरमा म्यानमारमा हाल उत्पन्न मानवीय संकटका पीडितहरूलाई राहत स्वरूप धर्मकीर्ति विहारको तर्फबाट नेपाल सरकारमार्फत म्यानमारका लागि ३० लाख ६० हजार रुपैयाँ सहयोग हस्तान्तरण गरिएको थियो।

यसअघि पनि सन् १९९४ (वि ।सं । २०५१) मा धम्मवती गुरुमालाई म्यानमार सरकारले “अग्गमहागन्थवाचक पण्डित” उपाधिबाट सम्मान गरेको थियो । गुरुमाको व्यक्तित्व र योगदान म्यानमारका जनताबीच अत्यन्त आदर, श्रद्धा र प्रतिष्ठाका साथ लिने गरिन्छ। वहाँले बौद्धशिक्षा र समाजसेवामा पुर्‍याउनु भएको समर्पणले अन्तर्राष्ट्रिय स्तरमै उहाँको छवि उज्यालो बनाएको छ।