भोलिबाट स्वयम्भू महोत्सव

काठमाडौं /भोलि शनिबारबाट स्वयम्भू महोत्सव सुरु हुने भएको छ ।
विश्व सम्पदा क्षेत्र स्वयम्भू क्षेत्रमा हुन लागेको यो महोत्सवको तयारी पूरा भएको जानकारी दिंदै यस महोत्सवले ‘स्थानीय पहिचान’ र ‘पर्यटन प्रवर्द्धन’सँगै समुदाय स्तरको अर्थतन्त्र चलायमान बनाउन भूमिका खेल्नेछ भन्ने विश्वास लिएको महोत्सवका संयोजक तथा काठमाडौं महानगर पालिका वडा नं १५ का वडा अध्यक्ष ईश्वरमान डंगोलले  बताएका छन् ।
काठमाडौं महानगर पालिका वडा नं १५ को आयोजना हुन लागेको महोत्सवमा सांस्कृतिक तथा मनोरञ्जनात्मक कार्यक्रम र खेलहरु समावेश गरिनेछन् । प्रदर्शनी र सेवाका लागि करिब ६० वटा स्टल रहने छन् । परम्परागत बाजा, वडाबासीका जन्मदेखि मृत्यु पर्यन्तका संस्कारसँग सम्बन्धित चित्र, संस्कृति र परम्परासँग सम्बन्धित चित्र, वुद्धको जीवनीसँग सम्बन्धित चित्र, हुलाक टिकट र मुद्रा प्रदर्शनमा राखिनेछन् । वडाबासीले उत्पादन गरेका मौलिक सामान तथा बस्तुको प्रदर्शनीले विशेष आकर्षणका रुपमा रहनेछन् ।
महोत्सवमा मौलिक खानाका स्टल, स्वास्थ्य परीक्षण, रक्तदानलगायत सेवा हुनेछन् । रञ्जना लिपि लेखन, मुहार चित्रकारिता (फेस पेन्टिङ्) जस्ता क्रियाकलाप महोत्सवका थप आकर्षण हुनेछन् ।
महोत्सवमा विभिन्न सांस्कृतिक कार्यक्रमका साथै कामपा १५ वडाका नृत्य  प्रशिक्षणरत महिला समूहको नृत्य पनि प्रस्तुति हुनेछ वडा सदस्य मैयाँ लक्ष्मी महर्जनले जानकारी दिइन् । नृत्य प्रशिक्षका रन्जु श्रेष्ठको प्रशिक्षणमा रहेका ३० जना महिलाहरुले महोत्सवमा नृत्य प्रस्तुत गर्नेछन्।
महोत्सवमा उपस्थिति र अवलोकनका लागि पनि संयोजक तथा वडा अध्यक्ष इश्वर मान डंगोलले अनुरोध गरेका छन् ।