शंखरापुर सक्वको पहिचान बढाउँदै सकियो शंखरापुर सक्व महोत्सव

काठमाडौं /ऐतिहासिक धार्मिक सांस्कृतिक सम्पदाको नगर शंखरापुर सक्वमा पर्यटन प्रवर्द्धनको नारा सहित  गरिएको शंखरापुर सक्व महोत्सव सफलतापूर्वक सकिएको छ ।
कार्यक्रम संयोजक तथा नगर प्रवक्ता राधाकृष्ण श्रेष्ठको सभापतित्व तथा शंखरापुर नगर पालिकाका मेयर रमेश नापितको प्रमुख आतिथ्यमा एक समापन कार्यक्रम गरियो ।
कार्यक्रममा विभिन्न उपसमितिमा रहेका संयोजकहरु पनि उपस्थित थिए ।
माघ १६ गतेदेखि माघ १९ गतेसम्म चलेको महोत्सवमा शंखरापुरको पहिचान गराउने थुप्रै प्रदर्शनी भएका थिए । स्थानीय साहित्यकारहरुको किताब प्रदर्शनीदेखि शंखरापुरको परिचय दिने विभिन्न कार्यक्रम भए । साँखुका महाकवि गिरिजाप्रसाद जोशीको स्मरणमा उनीद्वारा रचित गीतहरू विभिन्न गायक गायिकाले प्रस्तुत गरेर एक विशेष कार्यक्रम गरियो ।
स्थानीय जनसहभागितामा ठूलो सांस्कृतिक झाँकी निकालेर सुरु भएको महोत्सवमा लोकदोहरी प्रतियोगीतादेखि विद्यालय स्तरको कविता प्रतियोगिता पनि गरियो ।अर्कोतर्फ स्थानीय परिकारको स्टलहरुले मीठो स्वाद चाख्ने अवसर पनि प्रदान गर्‍यो भने नेवा: भोजको मज्जा लिन चाहने आगन्तुकहरुलाई नेवा: भ्वय् को पनि व्यवस्था गरिएको थियो ।
चित्रकला मूर्तिकलाका विशेष प्रदर्शनी निकै आकर्षक थिए ।
महोत्सवको दोस्रो दिनमा भएको लोकप्रिय गायक कुमा सागर र उनको ख्वप बायन्डले प्रस्तुत गरेको कन्सर्टमा मानव सागर झुमिएको देखिन्थ्यो ।
स्थानीय समुदायको परंरागत चिउरा कुट्ने बिधिदेखि माटोको भाँडो बनाउने कला पनि प्रस्तुत गरिएको देखिन्थ्यो ।
स्थानीय कृषि उत्पादन देखि कृषिका विभिन्न सामानको प्रदर्सन र बिक्री बितरणका स्टल पनि व्यवस्था गरिएका थिए।
बज्रयोगिनीको जात्राको बेला निकालिने मूर्तिहरु म्ह्वासुख्वा: माजु(बज्रयोगिनी) , चिभा:द्यो(स्वयम्भू चैत्य) सिघिनी ब्याघिनीका प्रतीक मूर्ती तथा खटहरु र विभिन्न समयमा निकालिने जात्रा परवका प्रतीकहरु पनि प्रदर्शनीमा राखिएको देख्न सकिन्थ्यो । भौढोकाबाट नगर प्रवेश लगत्तै देवी नाचका प्रतीकहरु राखिएका थिए ।
त्यसैगरी अर्थ शिक्षा संस्कृति इतिहास र पानीलाई लिएर विज्ञहरु समावेश गरि अन्तरसम्बाद कार्यक्रम पनि आयोजना गरिएको थियो ।
समग्रमा यो महोत्सवले शंखरापुर चिनाउन महत्त्वपूर्ण भूमिका खेलेको देखिन्छ ।
महोत्सव शंखरापुर सक्व नगर पालिकाको आयोजना वडा नं ६ र ७ को व्यवस्थापन र शंखरापुर उद्योग वाणिज्यसंघको सह आयोजनामा भएको थियो ।