लोकप्रिय वाद्यगुरु एवं संस्कृतिकर्मी कान्छाभाइ ज्यापुको “निस्त्यनाथ” गीत संग्रह विमोचित

काठमाडौं /लोकप्रिय वाद्यगुरु एवं संस्कृतिकर्मी कान्छाभाइ ज्यापुको “निस्त्यनाथ” गीत संग्रह विमोचन गरिएको छ । उनको देहावसान भएको छैठौं महिनाको पूण्यतिथिमा एक कार्यक्रमका बीच काठमाडौंको राष्ट्रिय सभा गृहमा लुम्बिनी विश्वविद्यालयका पूर्व उपकुलपति डा. त्रिरत्न मानन्धर ,वरिष्ठ साहित्यकार फणीन्द्ररत्न बज्राचार्य ,नेकपा(एमाले ) नेत्री अष्टलक्ष्मी शाक्य, ख्यालिजुजु मदनकृष्ण श्रेष्ठ ,प्रसिद्ध गायिका रमना श्रेष्ठ ,वरिष्ठ फोटोपत्रकार नातिकाजी महर्जन लगायतले उक्त गीति संग्रहको विमोचन गरेका थिए ।
कार्यक्रम विज्यापु त्वा: खल:का प्रमुख तुतुभाइ महर्जनको अध्यक्षतामा भएको थियो ।
कार्यक्रममा कान्छाभाइ महर्जनका जेठा छोरा पूर्णकाजी ज्यापुको लेखनमा रहेको कान्छाभाइ ज्यापुको जीवनीको शोकगीत भजनथली प्रस्तुत गरिएको थियो भने विभिन्न कलाकारहरुले कान्छाभाइ ज्यापुद्वारा रचित भजन तथा गीतहरू प्रस्तुत गरेका थिए ।
कार्यक्रममा काठमाडौंको स्वयम्भू ज्ञानमाला भजन खल: , नगां ज्ञानमाला भजन खल: लगायत विभिन्न भजन खल:हरुले पनि दिवंगत कान्छाभाइ ज्यापुको स्मरणमा उनीद्वारा रचित भजनहरु प्रस्तुत गरेका थिए ।
कार्यक्रममा मन्तव्य राख्दै लुम्बिनी बौद्ध विश्वविद्यालयका पूर्व उपकुलपति डा. त्रिरत्न मानन्धरले बालसखा कान्छाभाई महर्जनसँग शान्ति शिक्षा मन्दिर थँहितिमा सँगै स्कुल जीवन बिताएको स्मरण गर्दै उनी एक सच्चा संस्कृतिकर्मी रहेको बताए ।

लोककविराजभाइ जक:मिले कान्छाभाइ ज्यापुको जीवनीमा लेखेको कविता पाठ गरे भने लोकप्रिय हाँस्यकलाकार ख्यालिजुजु मदनकृष्ण श्रेष्ठले ब्रुद्धावस्थामा हुने पीडालाई गीतको माध्यममा व्यक्त गरे जुन निकै मर्मस्पर्शी रहेको थियो ।
कार्यक्रम बिज्यापु त्वा: खल:ले आयोजना गरेको थियो भने चमती नेवा: खल:ले मूल सहयोगीको भूमिका निभाएको थियो ।
कान्छाभाइ ज्यापू लोकप्रिय वाद्यगुरु एवं संस्कृतिकर्मी थिए ।
उहाँ काठमाडौंको परम्परा दाफा गुरु दबू प्याखं (नाट्क)का लेखक कलाकार निर्देशक समेत हुनुहुन्थ्यो । उहाँले धेरै नेपाल भाषाका गीत लेखन र गायन गर्नुभएको छ ।
जीवनको अन्तिम समयसम्म पनि यसै कार्यमा आफ्नो लगाव देखाइरहेका उहाँको श्वास प्रस्वासका रोगका कारण दुखद निधन भएको थियो ।(फोटो :प्रवीण महर्जन )