मालदिभ्समा सम्पन्न शारीरिक सुगठन प्रतियोगितामा पदक जित्न सफल नेपाली खेलाडीहरूलाई प्रधानमन्त्री केपी शर्मा ओलीको सम्मान

प्रधानमन्त्री केपी शर्मा ओलीले हालै मालदिभ्समा सम्पन्न १५ औँ विश्व बडीबिल्डिङ एण्ड फिजिकल स्पोर्टस् च्याम्पियनसिप, २०२४ मा पदकप्राप्त नेपाली खेलाडीलाई सम्मान गरेका  छन्।
प्रधानमन्त्री निवास बालुवाटारमा आयोजित विशेष कार्यक्रममा विभिन्न तौल समूहमा पदक जित्ने खेलाडी रुपेश शाही, प्रज्ज्वल शाक्य, रजनी शाक्य, र सोनाम मुलगुठीलाई सम्मान गरिएको हो।
प्रधानमन्त्री ओलीले शारीरिक सुगठन खेलको महत्त्व उल्लेख गर्दै यसको विस्तार र प्रवर्द्धनका लागि सरकारको तर्फबाट आवश्यक सहयोग गरिने प्रतिबद्धता व्यक्त गरे। “यो खेलले युवा पुस्तामा स्वस्थ जीवनशैलीको प्रेरणा दिन्छ र नेपाललाई अन्तर्राष्ट्रिय स्तरमा चिनाउन सहयोग पुर्‍याउँछ,” उनले भने।
नेपाल शारीरिक सुगठन महासंघका अध्यक्ष राजेशबाबु श्रेष्ठले शारीरिक सुगठन खेलले नेपालको खेलकुद र पर्यटन क्षेत्रमा सकारात्मक योगदान दिन सक्ने उल्लेख गर्दै यसको दीर्घकालीन विकासका लागि सरकारी प्राथमिकता आवश्यक रहेको बताए। कार्यक्रममा मदन भण्डारी स्पोर्ट्स एकेडेमीका अध्यक्ष ध्रुव आचार्यलगायत अन्य विशिष्ट व्यक्तिहरूको उपस्थिति रहेको थियो।
मालदिभ्समा सम्पन्न प्रतियोगितामा नेपाली खेलाडीहरूले उत्कृष्ट प्रदर्शन गर्दै अन्तर्राष्ट्रिय स्तरमा नेपालको प्रतिष्ठा बढाएका थिए।
यो सम्मान कार्यक्रमले शारीरिक सुगठन खेलप्रति सरकार र समुदायको चासो र सम्मानलाई झल्काएको छ।
माल्दिभ्समा आयोजित प्रतिस्पर्धामा चारै खेलाडी आआफ्नो समूहमा द्वितिय बनी रजत पदक हात पारेका थिए ।

उनीहरुलाई नेपालमा अवतरण भएपछि त्रिभूवन अन्तरराष्ट्रिय विमाणस्ठलबाटै बाजागजासहित स्वागत गरी नेपाल प्रवेश गराइएका थिए ।
यसअघि, विभिन्न संघ-संस्थाहरूले पनि यी विजयी खेलाडीहरूलाई सम्मान गरेका थिए। गत शनिबार सेभ नेवा भ्यालीले सानेपास्थित आफ्नै कार्यालय प्रांगणमा विशेष कार्यक्रम गरी खेलाडीहरूलाई सम्मान गरेको थियो।