लामो दूरीका क्षेप्यास्त्रहरू रुसमा प्रहार गर्नदिने अमेरिकाको अनुमति युक्रेनलाई

संयुक्त राज्य अमेरिकाका राष्ट्रपति जो बाइडनले अमेरिकाले उपलब्ध गराएका लामो दूरीका क्षेप्यास्त्रहरू रुसमा प्रहार गर्न दिने अनुमति युक्रेनलाई प्रदान गरेका छन्।
आगामी ज्यानुअरी महिनामा अमेरिकाको सत्ताबाट बाहिरिन लागेका बाइडनको प्रशासनले अमेरिकाले यसअघि युक्रेनलाई उपलब्ध गराएको आर्मी ट्याक्टिकल मिसाइल सिस्टम (एटीएसीएमएस) प्रयोग गर्न किएभलाई अनुमति दिएको बीबीसीको अमेरिकी साझेदार सीबीएस न्यूजले जनाएको छ।
लामो दूरीमा मार हान्न सक्ने क्षमता भएका अस्त्रहरू युक्रेनलाई दिन अमेरिकी सेना अनिच्छुक थियो। यद्यपि बाइडनले ती क्षेप्यास्त्र युक्रेनलाई उपलब्ध गराउन गोप्य निर्देशन दिएका विवरणहरू यसअघि सार्वजनिक भएका थिए।
तर यस्ता अस्त्रको प्रयोगले युद्ध चर्किने सम्भावनालाई दृष्टिगत गर्दै वाशिङ्टनले यसअघि प्रयोग नगर्न भनेको थियो।
ट्रम्पले युक्रेनलाई अमेरिकी सैन्य सहयोग उपलब्ध नगराउने अनुमान गरिएको छ।
तर उनले राष्ट्रपतिको कार्यभार सम्हाल्नुभन्दा दुई महिनाअघि बाइडन प्रशासनले आफ्नो नीति उल्ट्याउँदै अस्त्र प्रयोगको अनुमति दिएको हो। यसलाई अमेरिकी नीतिमा ठूलो परिवर्तन मानिएको छ।

अमेरिकाको निर्णयप्रति रुसमा चर्को आक्रोश व्यक्त भएको छ। रुसी राष्ट्रपति भ्लादिमिर पुटिनको कार्यालयले अमेरिकाले युद्धको “आगोमा घिउ थपेको” प्रतिक्रिया दिएको छ।
यसलाई आफूले युक्रेनबाट नभई अमेरिकाबाटै भएको आक्रमणको रुपमा बुझेको क्रेम्लिनले एक विज्ञप्तिमा जनाएको छ।
सत्ताबाट बाहिरिन लागेका अमेरिकी राष्ट्रपति जो बाइडनले तनाव बढाउन चाहेको “स्पष्ट” भएको उसले बताएको छ।
क्रेम्लिनसँग नजिक रहेको लिबरल-डेमोक्र्याटिक पार्टीका सांसद लिओनिद स्लुत्स्की उक्त कदमका कारण “अन्ततोगत्वा तनाव चुलिने र गम्भीर परिणाम निम्तिन सक्ने” ठान्छन्।
रुसको माथिल्लो सदनका सांसद भ्लादिमिर जबारोफले त्यसलाई “तेस्रो विश्वयुद्धतर्फको एउटा अभूतपूर्व कदम” भनेका छन्। courtesy:bbc