जानकी विवाह महोत्सवया ब्वना–पौ बीत मुख्यमन्त्रीया पुचः अयोध्या वन

वीरगंज , २ कछलागा : मधेस प्रदेशया मुख्यमन्त्री सतिशकुमार सिंहलिसें निसः व ५१म्हेसिया प्रतिनिधिमण्डल वइगु मंसिर २१ गते जुइगु जानकी विवाह महोत्सवया ब्वना–पौ ज्वनाः वीरगंजं भारतया उत्तरप्रदेशया अयोध्याय् च्वंगु श्रीराम मन्दिरपाखें वंगु दु । विश्व हिन्दू परिषद् जनकपुरया प्रमुख सन्तोषकुमार साहं मुख्यमन्त्रीनापं दूगु प्रतिनिधिमण्डल थौँ वीरगंजं रक्सौलनाका जुकाः अयोध्या वंगु धयादिल । “शनिबाः जनकपुरं बाजं थानाः ब्वना–पौ यात्रा न्ह्याकाःगु खः । शनिबाः बहनी वीरगंजय् हयाः बाय् च्वना । थौँ बहनीतकया दुने उत्तरप्रदेशया अयोध्या थ्यंकेगु जुइ । अयोध्या थ्यनेधुंका उगु मन्दिरया पदाधिकारीयात जानकी विवाह महोत्सवया ब्वना–पौ लःल्हाइ”, वय्कलं धयादिल, “सोमबाः अयोध्याय् च्वंगु राममन्दिरय् तिलकोत्सव न्यायेकेगु जुइ ।” परम्परागत कथं न्यायेका वयाच्वंगु जानकी विवाह उत्सवय् ब्वति कायेत प्रतीकात्मक रुपं भगवान् श्रीराम नापनापं प्यम्हं दाजुकिजा व रानीया निंतिं वसः, तिसा नापनापं माखन, धौ, बजी, सिसाबुसालिसें साःसागु नँसात्वँसा सगँया कथं राममन्दिरया पदाधिकारीयात लःल्हाइगु ज्याझ्वः दूगु परिषद्या प्रमुख साहं धयादिल । मुख्यमन्त्रीनापंया प्रतिनिधिमण्डलय् मधेस प्रदेशया गृह, सञ्चार व कानुनमन्त्री राजकुमार लेखी, उद्योग वाणिज्य व पर्यटनमन्त्री मोहम्मद सकिल मियाँ, श्रम व यातायात मन्त्री कौशलकिशोर यादव, वन लिसें वातावरणमन्त्री त्रिभुवन साहया दी । लिसें जनकपुरधाम उपमहानगरपालिकाया प्रमुख मनोजकुमार साह, जनकपुरधाम उद्योग वाणिज्य महासंघया अध्यक्ष सुरेन्द्र भण्डारी व जानकी मन्दिरया उत्तराधिकारी रामरोशनदान वैष्णवलिसें नागरिक समाजया प्रतिनिधित दुथ्याः । विश्व हिन्दू परिषद् जनकपुरया प्रमुख साहं वइगु मंसिर २१ गते विवाहपञ्चमीया न्हि अयोध्यां जनकपुरधामय् जन्ती वइगु परम्परा दूगु खँ कनादिल ।

राष्ट्रिय समाचार समिति, (रासस)