पोखरामा नेपाल सम्वत ११४५ को स्वागत-भव्य भिन्तुना र्‍याली

पोखरा । नेपालको राष्ट्रिय संवतको रुपमा राज्यबाट मान्यता पाएको नेपाल सम्वतको नयाँ वर्ष ११४५ को स्वागतार्थ पोखरामा भिन्तुना (शुभकामना) र्‍याली निकालिएको छ । नेवाः खलः कास्कीको आह्वान तथा बागबजार ताय मचा समितिको आयोजनामा कछलाथ्व पारुका दिन निकालिएको न्हूदँया भिन्तुना र्‍याली  पोखराको बागबजारबाट सुरु भएको थियो । र्‍याली विन्ध्यवासिनी, मोहरियाटोल, भैरवटोल , भिमसेन टोल हुँदै नेवा छेँ भवनमा आएर सभामा परिणत भएको थियो ।
सभामा बोल्दै प्रमुख अतिथि पोखरा महानगरपालिकाका मेयर धनराज आचार्यले देशका ६२ जिल्लामा जन्मेका व्यक्तिहरू पोखरामा बस्ने गरेको डाटाले देखाएको ८० भन्दा बढी जातीको बसोबास रहेको बताए । कतिपय संस्कृति जोगाउन गाह्रो भएको हुनसक्ने भन्दै महानगरपालिकाले जातजाति, धर्म, संस्कृति र साहित्यलाई जोगाउनका लागि गरिने कार्यक्रममा सहयोग गर्दै आइरहेको भन्दै मेयर आचार्यले नयाँ पुस्तामा भाषा हराउँदै गएको भन्दै चिन्ता व्यक्त गरे । कतिपय जातजातिको भाषाको लिपि नभएर बोलीचाली मात्र रहेको भन्दै भाषालाई जोगाउन महानगरपालिकाले सबै खाले सहयोग गर्न तयार रहेको र त्यसको सदुपयोग गर्न पनि आग्रह गरे ।
नेवाः खलः कास्कीका वरिष्ठ उपाध्यक्ष तीर्थ श्रेष्ठले स्वागत गरेको कार्यक्रममा नेपाल उद्योग वाणिज्य संघका वरिष्ठ उपाध्यक्ष अञ्जन श्रेष्ठ र तामाङ घेदुङ कास्कीका अध्यक्ष भक्त तामाङले शुभकामना मन्तव्य राखेका थिए ।
र्‍यालीमा सहभागी ४० वटा समुह मध्ये रूपा देउराली नेवाः खलः प्रथम बन्दै नगद २५ हजार हात पार्‍यो । यसैगरी फेदी नेवाः खलः द्वितीय, झीगु भाय् झीगु संस्कृति पुचः तृतीय र भिमसेनटोल मिसा पुचःले सान्त्वना पुरस्कार पाए ।र्‍यालीको निर्णायकमा निरञ्जन बजिमय, सुरेश कुमार श्रेष्ठ र सोनी ढेवाजु रहेका थिए ।
नेवाः खलः कास्कीका अध्यक्ष अशोक पालिखेको अध्यक्षतामा भएको समापन समारोहको सञ्चालन महासचिव श्रीकृष्ण कतिलाले गरेका थिए ।
कार्यक्रममा बोल्दै अध्यक्ष पालिखेले यस्ता कार्यक्रमले तीन तहका सरकारले पर्यटकीय राजधानी पोखरा भनेर कार्य योजना अगाडी बढाएको योजनालाई सघाउ पु¥याउने बताए । सबै जातजातिको काय्र्रक्रममा सबै जातजाति सहभागी हुने वातावरण सिर्जना गर्नुपर्नेमा उनले जोड दिए । महानगरको क्यालेन्डरमा यहाँका विभिन्न जातजातिले मनाउने पर्व तथा आयोजना गर्ने र्‍यालीको बारेमा राखेर व्यापक प्रचार प्रसार गर्न उनले आग्रह समेत गरे ।
झण्डै २५ सयको हाराहारीमा सहभागिता रहेको कार्यक्रममा कास्की जिल्लामा रहेका ४८ वटा कचा खलःहरु, ३१ वटा ल्याय्म्ह पुचः र ४३ वटा मिसा पुचः सहितका नेवार समुदायका विभिन्न संस्थाका साथै ब्राम्हण समाज, क्षत्री समाज, तमु धिं कास्की, मिरुवा तमु समाज, ह्योल्मो समाज, नेपाल मगर समाज, चौधरी समाज, नेपाल तामाङ घेदुङ, हिमाली सांस्कृतिक परिवार, मञ्जुश्री तामाङ बौद्ध समाज लगायतको समेत सहभागिता रहेको महासचिव कतिलाले बताए ।
पोखरामा पनि नेपाल संवतका प्रणेता तथा राष्ट्रिय विभुति शंखधर शाख्वाःप्रति सम्मान र श्रद्धाका साथ भिन्तुना र्‍याली निकालिएको हो । नेवार समुदायमा कछलाथ्व पारु अर्थात् वर्षको पहिलो दिन म्हपुजा गर्ने गरिन्छ जून नेवार समुदायको एउटा विश्वलाई देखाउन सकिने नमूना संस्कृति हो । यो दिन नेपाल सम्वतको नयाँ बर्ष प्रारम्भ हुने दिन भएको हुँदा, नव वर्षको स्वागतार्थ हरेक बर्ष पोखरामा भिन्तुना र्‍याली  निकाल्ने गरिएको छ ।
(समाचार सहयोग सिटी वान टेलिभिजन पोखरा)