“नेवार समुदायको आत्मा झल्काउने पुस्तक -ज्ञानकोष”- मल्ल के. सुन्दर

काठमाडौं/ जनकवि दुर्गालाल श्रेष्ठ, क्रोधकला शिरोमणि कालु कुम्हाः, वरिष्ठ संगीतकर्मी श्रीगोपाल प्रजापति, बौद्धविद्वान यज्ञमानपति वज्राचार्य, र वरिष्ठ साहित्यकार सुवर्ण चित्रकारजस्ता नेवा: हस्तीहरुको हातबाट नेवाः समुदायको वृहद् पहिचान झल्काउने ‘नेवाः सांस्कृतिक ज्ञानकोश’को विमोचन भएको छ ।
कार्यक्रममा नेवाः परम्परा अनुसार मण्डल बनाई पूजा गरी, पुस्तकलाई विमोचन गरिएको।
२८ सय पृष्ठमा फैलिएको यो पाँच खण्डको ज्ञानकोशमा ‘नेवाः म्हसीका’ (नेवाः पहिचान), ‘संस्कृति र सम्पदा’, ‘भाषा, लिपि र साहित्य’, ‘म्ये, बाजं व प्याखं’ (गीत, बाजा र नाट्य), र ‘शिल्प, प्रविधि र ज्ञान’ समावेश छन्। यो महत्त्वपूर्ण प्रकाशन काठमाडौं महानगरपालिकाको सहयोगमा नेपालभाषा एकेडेमीले निकालेको हो।
कार्यक्रममा काठमाडौं महानगरपालिकाका उपमेयर सुनिता डंगोलले यस ऐतिहासिक पुस्तकको प्रकाशनमा सहकार्य गर्न पाउँदा अत्यन्तै खुसी लागेको बताउँदै यसको नेपाली र अंग्रेजी अनुवादका लागि पनि महानगरपालिकाले सहयोग गर्ने प्रतिवद्धता जनाइन्।
साहित्यकर्मी अधिकारकर्मी लेखक तथा नेपालभाषा एकेडेमीका उपकुलपति मल्ल के. सुन्दरले, ज्ञानकोश नेवाः समुदायको आत्मा झल्काउने पुस्तक भएको भन्दै नेवाः परम्परालाई आत्मसात् गर्दै पुस्तकलाई पूजा गरेर विमोचन गरिएको बताए ।
ज्ञानकोश तयार गर्न तत्कालीन मेयर विद्यासुन्दर शाक्यको पालामा काठमाडौं महानगर पालिकासँग सम्झौता भएको थियो भने त्यसको तीन वर्षपछि हिजो ज्ञानकोषका ५ ठेलीहरु सार्वजनिक गरिएको थियो ।