साँस्कृतिक ज्ञानकोश विमोचित

यें/ नेवाः म्हसीका पित बिइया नितिं नेवाःतसें आपालं ज्याखँत याना वनेमाःगु दयाच्वंगु दुसा गुलिखय् ज्याखँय् नेवाःत न्ह्योचिला नं वयाच्वंगु अवस्था दु । थ्वहे झ्वलय् नेपालभाषा आकादेमिपाखें नेवाःतय्गु म्हसिकाया विविध पक्षयात दुथ्याकातःगु नेवाः सांस्कृतिक ज्ञानकोश सफू पिथनेगु ज्या नेसं ११४४ यंलाथव तृतीय २०८१ साल भाद्र २१ गते शुक्रवाः याःगु दु ।

थुगु ज्ञानकोष सफूयात न्यागू ब्वय् ब्वथला पिथनेगु ज्या याःगु दु । पिदंगु सफूया थीथी विधाखय् १. नेवाः म्हसिका, २. नेवाः संस्कृति व सम्पदा, ३. नेवाः भाषा लिपि व साहित्य, ४. नेवाः म्ये, बाजं व प्याखं, ५. नेवाः शिल्प, ज्ञान व प्रविधि खः । थनया राष्टिय नाचघरया हलय् सफूया उलेज्या नेवाःया विविध ख्यःया हस्तिपिन्सं सफूयात नेवाः मौलिक शैलीं पुज्यानाः यानादीगु खः ।

उगु ज्याझ्वलय् विशिष्ट पाहाँपिं कथं विधागत विज्ञ न्याम्ह पाहाँपिं नेवाः म्हसीकापाखें जनकवि दुर्गालाल श्रेष्ठ, संस्कृति व सम्पदा विज्ञ यज्ञमानपति बज्राचार्य, भाषा, लिपि व साहित्यविद् सुवणर् केशरी चित्रकार, नाट्य, संगीत व बाजंविद् श्रीगोपाल प्रजापति व शिल्प, प्रविधि व ज्ञानविद् क्रोधकला शिरोमणि कालु कुमालेपिन्सं मकांरुपं सफू पितब्वज्या यानादीगु खः ।

येँ महानगरपालिकाया सम्पदा व पर्यटन समितिया कजि आशामान संगत भाजुं लसकुस न्वचु बियादीगु उगु महत्वपूणर् सभाय् सफू उलेज्या यानादीपिं व्यत्तित्वपिन्त साहित्य व संस्कृतिविद् शाक्य सुरेन, संस्कृतिविद् डा. चुन्दा बज्राचार्य, प्रा. प्रेमशान्ति तुलाधर, त्रिरत्न मानन्धर व विश्व शाक्यपिन्सं सफू लःल्हानादीगु खः । लोकय् नेवाः म्हसीकायात जीवन्तता बिया तयत थुकथंया सफूया आवश्यकतायात मध्ये नजर तयाः नेपालभाषा एकेदेमीपाखे येँ महानगरपालिकाया ग्वाहालिइ थुुगु सफू तयार याना पितव्वज्या याःगु खः ।

थुगु सफूयात खय् भासं व अंग्रेजी भासं अनुवाद यानाः पिथने माःगु नं सः पिदनाच्वंगु दुसा थुकिया नितिं येँ महानगर पालिकाया उपमेयर सुनिता डंगोलं बजेट तयाः ज्या न्ह्याका वनेगु खँ कनादीगु दृु । वयकः मयजु डंगोलं थःगु नुगः खँ कनेगु झ्वलय् नेवाःतसें सरकारी ज्या यायत तसकं थाकुया च्वंगु खँ उलादिसें झीसं झीगु ज्या यायत महानगरपालिकाय् झीगु सरकार दयमाःगु खँ नं कनादीगु दु । वजेतया सवालय् कार्यकारी अधिकार मदयाच्वंगु हुनिं झीसं आपालं संघर्ष यायमानिगु अवस्था दु धकाः धयादीगु दु । थौं झी दुने हे आपालं संघर्ष याय्मानिगु अवस्था जुयाच्वंगु खँ नं उलादीगु दुसा उपमयेर याकःचा जक हालां मगाः मगानिगु हुनिं स्थानीय जनतां नं सरोकार क्यना थःगु अधिकारया सः क्वातुक तयाः न्ह्यावनेमाःगु खँय् बः बियादीगु दु ।

थुगु तयार यायत दयकूगु परियोजनायात महानगरपाखें ग्वाहालि दयकेत ज्याय् येँया पुलांम्ह मेयर बिद्या सुन्दर शाक्यया योगदान दयाच्वंगु दु ।

उगु ज्याझ्वलय् परिकल्पनाकार एवं नेपालभाषा आकादेमिया भाइस चान्सलर मल्ल के सुन्दरं सफूतिइ दुथ्यानाच्वंगु विषयवस्तुयात कःघाना थःगु खँ तयादीगु खः । उगु ज्याझवलय् सभापतिया थासं उपमेयर सुनिता डंगोल, जनकवि दुर्गालाल श्रेष्ठ, आकादेमिया सचित डा. पुष्पराज राजकणर्िकार व आकादेमिया चान्सलर यज्ञरत्न ध्वाखापिन्सं नं थःथःगु नुगः खँ तयादीगु खः ।

-सुगत रत्न सिन्दुराकार