संस्कारया स्वापू ( चिबाखं)

गुरू पुन्ही । जिगु जन्मन्हि । गणेद्यः छम्ह पुज्याना , ख्यें सगं छता कयाः अःपुक जन्मन्हि न्यायेकाच्वनाम्ह जि । छम्ह मनुखं खापा घाराघारा संकःवल । पुलांम्ह पासा मुकुन्द दास वोगु जुयाच्वन । अंग्रेजी बिषयया छम्ह प्राध्यापक ।

जि जन्मन्हि यानाच्वंगु वं खन । नापं फ्यतुका । ख्येय् सगं , मरि छता व धौ भचा नं ख्वल्चाय् तयाबिया । जिं नं नया । वयात नं नका । सुकुन्दाय् इताः गुनुहुॅ च्यानांच्वन ।

अनया लकस स्वस्वं पासां धयाहल ,” छ नं परम्पराबादी हे जुयाच्वन का । द्यः पुज्यानाः जन्मन्हि न्यायेकाच्वन । गणेद्यः पुज्यानाच्वन । अय् स्वय् नास्तिक का जि ला ।जिं सुयातं द्यः धकाः मानय् मयाना । सुयातं पुज्याये नं मयः । पु नं मज्याना । व महाद्यो पार्बती धाइ । व राधा कृष्ण धाइ । ब्रम्हा बिष्णु धाइ । फुकं काल्पनिक पात्र जक । मन कथा । द्यः धयाम्ह सुं नं मदु । छुं नं मखु । न स्वर्ग दु थन , न नर्क हे । दुसा केवल बॅग्वारा (पृथ्बी ) छगः दु गुकी झी च्वंच्वना । दाट् ईज अल । मेगु फुक्क ननसेन्स ” छगू हे सूरय् पासां खॅ मुइकाच्वन ।

वया मोबाइल न्यात । लिहाॅ वनेत हथाय् चाल । जि नं पसः छता वनेमाःगु । पिने बस स्टप तक वयात नं त्वःताथके धकाः नापं पिहाॅ वना ।

लॅय् लिक्कसं गणेद्यःया देगःचा छगः दु । अन थ्यनेव वया पलाः भचा चिपलाः जुल । द्यः छचाः चाहिला परसात छकू कयाः वं म्हिचाय् स्वथन ।

जि नं अनसं दु धैगु खॅ वया भुसुक्क हे लोमन । वयागु ज्या खॅ स्वस्वं जि वाताहाॅ जुयाच्वना !!