बहुमतको सरकार गठन गर्न राष्ट्रपतिद्वारा आह्वान

फोटो :साभार

काठमाडौं /प्रधानमन्त्री पुष्पकमल दाहाल ‘प्रचण्ड’ प्रतिनिधिसभाबाट विश्वासको मत प्राप्त गर्न विफल भएसँगै स्वतः पदमुक्त भएपछि
राष्ट्रपति रामचन्द्र पौडेलले बहुमतका आधारमा नयाँ प्रधानमन्त्री गठनका लागि आइतवार साँझ पाँच बजेसम्मको समय सीमा दिएर दलहरूलाई आह्वान गरेका छन् ।
तर एमाले अध्यक्ष केपी शर्मा ओली र कांग्रेस सभापति शेरबहादुर देउवासहित नेताहरू शुक्रवार राती नै शितलनिवास पुगेर ओलीका नाममा दाबी पेश गरेका छन्।
यसै सन्दर्भमा राष्ट्रपति कार्यालयद्वारा एक विज्ञप्तिमा जारी गरिएको छ ।जारी विज्ञप्तिमा यसरी उल्लेख गरिएको छ: “नेपालको संविधानको धारा ७६ को उपधारा २ बमोजिम प्रतिनिधि सभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रतिनिधिसभाको सदस्यलाई नेपालको प्रधानमन्त्री पदमा नियुक्त गर्ने प्रयोजनका लागि सम्माननीय राष्ट्रपतिज्यू समक्ष आफ्नो दाबी मिति २०८१/३/३० गते आइतवार अपराह्न ५ बजेभित्र पेश गर्न आह्वान भएको छ।”
नेपालको संविधानको धारा ७६ (२) मा प्रतिनिधिसभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रतिनिधिसभाको सदस्यलाई राष्ट्रपतिले प्रधानमन्त्री नियुक्त गर्ने व्यवस्था उल्लेख छ।
सामान्य त संविधान अनुसार यसरी प्रधानमन्त्री अल्पमतमा परेर सरकार भंग भएपछि सबैभन्दा ठूलो दलको नेतृत्वमा सरकार बन्ने प्रावधान रहेको छ । यसअनुसार केपी ओली प्रधानमन्त्री बन्न सक्ने अवस्था छैन । यसका निम्ति संविधान परिमार्जन गर्नुपर्ने तर्क पनि विज्ञहरुले गरेका छन् ।
यसैक्रममा ओवादी नेताहरूले विश्वासको मत विफल भएकाले अब बहुमतका आधारमा नभई संसद्को ठूलो दलले सरकार बनाउनुपर्ने बताएका छन् ।
यसैबीच राष्ट्रपतिले संविधानविदहरुसँग सल्लाह गरेको पनि भनिएको छ ।
राष्ट्रपति कार्यालयले यसअघि आजै जारी गरी गरेको विज्ञप्तिमा अर्को मन्त्रिपरिषद् गठन नहुँदासम्म प्रचण्डलाई नै कार्य सञ्चालनको जिम्मेवारी तोकिएको जनाइएको थियो।

फोटो: साभार