चाकुमरि ( छपु चिबाखं)

मथुरा साय्‌मि

निम्ह बाज्यःवंपिं पासापिं बसन्त व शरदपिं नेवाः झ्वःभ्वजय् थितुंथीक झोछुत । लपते लायेहयेव झोलिं घासात छता छता यायां तयेहल । बुलुहुॅ लपते जायावल । निम्हसिनं द्यः छायाः बजि भ्वाःतित । तःता घासा अले ला नं नितानिता दु । भ्वय् तःजि । निम्हसिनं त्यंक नल । जेरि छपा चिनिया ल्वय् दुम्ह बसन्तं छखेलाक्क चीकातल ।
दक्कय् लिपा पाउँ क्वाः तयेहल । काजु , नैंक्याः व हिं तयाः दायेकातःगु आमालि क्वाः। तिक्खर । म्हुतु हे चक्कं । झोल भचा भचा नं उमिसं फ्वनाः हे लिसाकाल । धौ तयेहल । धुतुक्कलाल नं भचा क्वफात । भ्वय् क्वचाल ।
भ्वय् ज्वरययापिं थॅहितिमित हे जकं ला मखुला धकाः उमिसं धक्का ततं गफ नं छझा मुइकल ।
अन्तिमय् मरि छता हानं तयेहल । बरफि छकू छकू । चिनिया ल्वचं ग्रस्तम्ह वसन्तं मयो मधाः । फया हे काल । शरदं नवात ,” का, बरफि नं काल छं । जेरि ला बिष हे बराबर । बरफि नं उथेहे खः । मकाःसां ज्यूगु । सितिकं वन मखुला ,म्वाःसां । ”
बसन्तं ननिमवाः । लिफःन्ह्यफः जक स्वैच्वन । भ्वय् कोचाल । सकलें दनाहल ।
शरदं पासाया लपते मरि मखन ।मरि छतां मखनेवं धयाहल , ” अय् , छंगु मरि गन वन ? ”
बसन्तं वया म्हुतुप्वाः ती थें धाल , ” हालेमते । हालेमते । भ्वॅतय् पोचिनाः म्हिचाय् स्वथने धुन जिं । जिथाय् च्वंम्ह खिचाया चाकुगु मरि धालकि साप यो , छु । ”
शरद तीन छक्क जुल !!!