वरिष्ठ संगीतकर्मी रत्न “बेहोशी”,पूर्व मेयर विद्यासुन्दरलाई गणेशदेवी स्मृति सम्मान

रन्जु श्रेष्ठ,काठमाडौं /नेपाल भाषा र संगीत क्षेत्रमा विशेष योगदान गर्नुहुने सर्जक तथा अभियन्तालाई काठमाडौंमा गणेशदेवी स्मृति पुरस्कारले सम्मानित गरिएको छ । लामो समय संगीत क्षेत्रमा योगदान गरेका वरिष्ठ संगीतकार तथा गायक रत्न “बेहोशी” तथा भाषिक क्षेत्रमा ठूलो योगदान गरेका काठमाडौं यें महानगर पालिकाका पूर्व मेयर विद्यासुन्दर शाक्यलाई गणेशदेवी फाउन्डेसनबाट हरेक वर्ष प्रदान गरिने गणेशदेवी स्मृति पुरस्कार प्रदान गरिएको हो ।
फाउन्डेसनका अध्यक्ष कवि स्नेह सायमिको प्रमुखत्वमा भएको कार्यक्रममा वरिष्ठ साहित्यकार मथुरा सायमी प्रमुख अतिथिका रुपमा रहेका थिए ।
कार्यक्रमलाई सम्बोधन गर्दै प्रमुख अतिथि मथुरा सायमीले आफू पूर्ण रूपमा स्वस्थ नभएपनि महत्वपूर्ण कार्यक्रममा निम्तो आएको र त्यसलाई स्वीकार गर्दै कार्यक्रममा सहभागी भएको बताए । यो पुरस्कार कार्यक्रमको महत्व छ उनले बताए ।
सम्मान ग्रहण गरिसकेपछि लामो समय रेडियो नेपालमा समेत संगीत र गायन क्षेत्रमा सेवा गरेका रत्न बेहोशीले सुभाय् पोस्ट प्रतिनिधिसँग कुरा गर्दै आफूले यस्तो धेरै सम्मानहरु पाइसकेको भएपनि यो पुरस्कारले सम्मानित हुन पाउनु गर्वको विषय भएको बताए ।
अर्का सम्मानित व्यक्ति विद्या सुन्दर शाक्य जसले काठमाडौं महानगर भित्रका बिद्यालयहरुमा अनिवार्य नेपाल भाषा पढाउने व्यवस्था गरे यसवापत आफूलाई सम्मानित गरेकोमा खुशी व्यक्त गर्दै आफू राजनीतिक अभियन्ताभन्दा पहिला भाषिक अभियन्ता भएको बताए । उनले सबै भाषालाई आफूले समान अवसर दिनुपर्नेमा जोड दिंदै आएको र आफ्नो क्षेत्रमा स्थानीय भाषालाई प्राथमिकता दिनुपर्ने नीति अनुरुप सो कार्य गरेको बताए । नीति नियम बनाउने कार्यमा आफू लागेको तर अन्य धेरै कामहरु गरि योगदान गर्ने व्यक्तित्वहरुलाई पनि उनले त्यहाँ स्मरण गरे ।
यसभन्दा अगाडि कार्यक्रममा पुरस्कार निर्णायक समितिका सदस्य वरिष्ठ पत्रकार सुरेश किरणले सम्मानित हुने व्यक्तिहरुको योगदान बारे चर्चा गरेका थिए । video link facebook.com/share/v/9y3zM2tm9pzhqYv4
कार्यक्रमको अन्त्यमा सभाको प्रमुखत्व लिइरहेका कवि स्नेह सायमिले उपस्थित सबैप्रति आभार प्रकट गरे ।
कार्यक्रमको सुरुवातमा स्वर्गीय गणेशदेवी मानन्धरको तस्वीरमा आगन्तुकहरुले पुष्प गुच्छा अर्पण गरेका थिए।
गणेशदेवी फाउन्डेसन काठमाडौं महानगर पालिका वडा नं १३ मा सक्रिय समाजसेवी दिलबहादुर मानन्धरले आफ्नी स्वर्गवासी धर्मपत्नी  गणेशदेवी मानन्धरको स्मृतिमा  उनका परिवारका सदस्यहरु छोराहरु डा.राजु मानन्धर (अष्ट्रेलिया )राजेश मानन्धर सज्जु मानन्धर लगायतको सक्रियतामा स्थापना गरेको हो । नेपाल भाषा, संस्कृति, संगीत क्षेत्रमा योगदान गर्ने व्यक्तिहरुको सम्मानमा गत वर्षबाट  यस फाउन्डेसनले पुरस्कार तथा सम्मान प्रदान गर्न थालेको थियो भने पुरस्कार राशी जनही २५ हजार रुपैयाँ रहेको छ ।