गणेशदेवी मानन्धर स्मृति प्रतिष्ठानं सम्मान ज्याझ्वः याइगु

गणेशदेवी मानन्धर स्मृति प्रतिष्ठानया ग्वसालय् नेपालभाषा ख्यलय् याेगदान यानाच्वंपिं व्यक्तित्वपिंत सम्मान ज्याझ्व: याइगु जूगु दु ।

वरिष्ठ साहित्यकार मथुरा सायमिया मू पाहांसुइ येंया कालमती च्वंगु दस  इभेन्ट भेन्युइ थ्व ज्याझ्व: जुइत्यंगु ख:।

कवि स्नेह सायमिं गणेश देवी मानन्धर स्मृति प्रतिष्ठानया नेतृत्व यानाच्वनादीगु दु ।

दिवंगत गणेश देवि मानन्धरया नामय् थ्व प्रतिष्ठान स्वनेज्या जूगु ख: । – गणेशदेवी मानन्धर येँ महानगरपालिका १३ वडाया समाजसेवी दिलबहादुर मानन्धरया जहान खःसा वयकया कायपिं सह प्रा. डा. राजु मानन्धर (अस्ट्रेलिया), राजेश मानन्धर व सज्जु मानन्धर खः । दिवंगत् गणेशदेवी मानन्धरया लुन्तिइ वय्कःया परिवारपाखें गणेश देवी मानन्धर स्मृती प्रतिष्ठान गठन याःगु खः ।

थुगु प्रतिष्ठानं वंगु दँय् जन गायक भृगुराम श्रेष्ठ, वरिष्ठ सिनेपत्रकार बिजयरत्न असंवरे व न्हूगु प्रतिभा कथं सिद्धार्थ बज्राचार्ययात छगू समाराेह याना: तःजिक सम्मान यासें सिरपाः ल:ल्हा:गु ख: ।

संस्थाया संस्थापक दुज: लिसें थौकन्हय् अष्ट्रेलियाय् च्वना: अनया थीथी संस्थाय् सल्लाहकार जुयाच्वनादीम्ह डा. राजु मानन्धर वयक: गुथि ऑस्ट्रेलियाया सल्लाहकार लिसें अष्ट्रेलियाया दक्कलय् पुलांगु नेपाली संस्था नेपालीज़ अष्ट्रेलियन एसोसियेशनया महासचिव नं जुयादी । वयकलं “गणेशदेवी स्मृति प्रतिष्ठान” नेपाल भाषा ख्य:या हनेबह:पिन्त हनाबना तया: श्रद्धा क्यनेगु व न्हूपिन्त उत्साह बिया: उत्थानया लँपुइ न्ह्यावनेगुगु आजु कया: पलिस्था जूगु धासें थ:पिं महाकवि सिद्धिदास महाजुया धापू “भाषा म्वा:सा जातिम्वाइ ” नुगलय् तया: न्ह्यावनाच्वनागु खँ कनादिल । व हे खँयात नुग्लय् तया: परिवार पाखें थ्व प्रतिष्ठान स्वनेज्या जूगु अले लक्ष्यकथं न्ह्या:वनाच्वंगु व वहे झ्वलय् थ्व हना ज्याझ्व व सिरपा इनेज्या जुइत्यंगु खँ कनादिल ।

प्रतिष्ठानया नाय: कवि स्नेह सायमिं हनेज्या व सांगीतिक ज्याझ्व:या नितिं प्रतिष्ठानया ज:पिं व छेंज:पिं लिसें सहलह याना: ज्याझ्वया तयारी अन्तिम चरणय् थ्यंगु व हनेबह:म्ह मथुरा सायमिलिसें  थीथी व्यक्तित्वपिन्त नापलाना:  सहलह यायेगु  ब्वनेगु ज्या जुइधुंकुगु खँ कनादिल । ग्वसा:खल:या कथं सम्मानित जुइपिनिगु नां धा:सा ज्याझ्वलय् जक जानकारी बिइगु खँ नं सीदुगु दु ।