चित्र-बिचित्र ( छपु चिबाखं )

मथुरा साय्‌मि

………..सुमन पसः वनावल । सामान स्वाहानेसं दिकाः तपागु खाम छगू ज्वनाः व बैठक क्वथाय् दुहाॅ वन । रंजना सुमनया चबूगु टाॅख छफो स्वानाच्वन ।

“स्व रे । लॅय् थ्व छपा फोटो स्वैगु खः मस्यु । अथें कुतुं वनाच्वन । ” स्वैगु थ्व ?”धकाः न्यना । सुनानं नालाकाः मवः । सुयात बी , सुयात बी । जिं ला ज्वना हे वया , ” धाधां खामयच्वंगु फोटो पिकया तेबिलय् ब्वयाबिल ।
छम्ह नच्चाम्ह मिसाचिया फोटो । यचुपिचु । बांलाः । कुं खिनेथाय् गनं मदु ।

” स्वैगु फोटो जुइ थ्व । माःगु छेय् हयेगु ला । अथें अन हे त्वःताथके का । ल्यासेम्ह जुया हःगु जुइ लाःसा छिं । यल कि छु छितः ? ” रंजनां मौकाय् घुर्कि नकल ।
” छु खॅ ल्हाइ छु खॅ ल्हाइ । खॅ ल्हाये दयवं गात छं ,” सुमनया म्हुतुं सः पिज्वल ।
पलख तेबिलय् च्वंगु फोटो छकः निम्हसिनं क्वथीक स्वत ।म्हस्यूम्ह मनू हे मखु ।
सुमनया मिखाय् किपाय् छु छता मगाः थे छु छता मगाः थे जुयाच्वन । उखे रंजनाया म्हय् दुने पिपिहापिं खनेमदुपिं कीचात वालावाला हनाहः थे जुल ।
+ + +
सुमन न्हापा चित्र कला अध्ययन याये धुंकूम्ह छम्ह बिद्यार्थी । छम्ह चित्रकार । चित्रकलाया हलं ज्वलं रंगरोगन , ब्रस कलर बक्सत स्वथनातःगु वया आतकं दनि । लाइबले छपानिपा चित्र आः नं क्यूनि ।
सुमन याकःचा हालाहल ,” थ्व चित्र पू मवंनि । थुकी ज्यान हे दु थे मच्वंनि । प्राण हे दु थे मच्वंनि ।
× × ×

सब्बू चा । रंजनाया न्ह्यलंचाल । थः लिक्क देनाच्वंम्ह बुरा लासाय् मदु । गबायतजालं नं क्वथाय् मवसेंलि दनाः बाथरूमपाखे स्वःवन । अन नं मदु । सुमन ला बैठकय् व हे किपाय् सनाच्वन । रंग पानाच्वन । आबेसे सुमन हालाहल , ” का स्व , थ्व किपा आःतिनि पूवन । आःतिनि थ्व चित्रय् ज्यान दत ।”
सुमनं किपा ल्ह्वनाः रंजनायात क्यन ।

किपाय् वयात ह्याॅउक सिन्हः छपता तिकातये धुंकल । रंजना मि जुयाः हाल ,” सिन्हः तिकेगु जक मखु । भुइसिन्हखं छहाकः सिंचा नं छायेका ब्यु । अले पूवनी का छिगु चित्र । ”

रंजनां तमं फोटो झाताक थःगु ल्हाती सालाकाल । झ्याररर झिररं खुत । चुंचुंथलाः प्यख्यरं ह्वलाछ्वत । अले चिल्लाय् दनाः हाल , ” कन्हे मुहालिं पुयाः काःझासॅ । अले भमचा यानाः छेय् दुत हैदिसॅ । ”
सुमन बुॅइ धस्वाकातःम्ह बुख्याचा थे याकःचा जुल !!!