चितासू ( चिबाखं)

मथुरा सायमि

नयेधुंकाः घौछि आनां न्हयः वयेकाच्वनेगु किसलालया बानि । थौ बरू लासाय् मच्वं । सोफाय् फुंग निगः देतनाः अथें हे लिधनाः च्वंच्वन ।
भमचाम्ह न्ह्यःने वयाः न्यन ,” बाःयात छुं माःसा धैदिसॅ । । मखुसा जि तले वसः निता हियावये । ”
” ज्या दुसा थाहाॅ हुॅ । थन च्वंच्वने म्वाः । छ्यों भचा स्यानाच्वन । कपाः भचा क्वानाच्वन । ज्वर जकं दुला । अथे या रे । निको धाःगु वासः छचाः व लः छगिलास तयाथकि । कपाः स्यानावोसा नयाः छकः ग्वतू वने ।
बाजुम्हं उजं ब्यू थे वासः निचाः व लःया बोटल न्ह्यःने तयाः भमचाम्ह थाहाॅ वन ।

किसलाःया वासः छकः छकः लः छकः छकः स्वयाः घुरय् जुयाच्वन । नःगुं मखु , त्वंगुं मखु ।
+ + +

निघौति लिपा दां त्याय् कयातःम्ह वया पासा धर्म राज तुप्लुक्क थ्यंकः वल बैठकय् हे निम्हं ध्वदुल ।
साॅवा व ब्याज नं धकाः धर्म राजं दां पिकयाः ल्याःखाना बिल , थ्व साॅवा जुल । अले थ्व ब्याज ।आः हिसाब मन्त न्है ।”
किसलाल लयताल । लयतातां धयाहल , ” सुभाय् दु धर्म राज । छ धात्थे धर्म दुम्ह हे मनू जुयाच्वन । यक्व यक्व सुभाय् ।
धर्म राज नं लयताल । सुभाय् कालबिल यानाः याकन व बायावन ।

पलख जायव किसलालं वासः नं छखे चीकाछ्वत । लः नं गमलाय् प्वंकाछ्वत ।
किसलाःया सोफाय् हे फसफसं न्ह्यः वल 😁😁 !!!