धुकूपिकू ( छपु चिबाखं)

मथुरा साय्‌मि

देनाच्वंम्ह हंसराजया मिं पूम्ह थें मिखा निगलं चालावन । लासाय् फ्यतुनाः छकः कूनल । याकःचा अले पुतुपुतुं हालाहल , ” गपायचो ग्यानापुसे म्हनाच्वंगु जुइ थ्व म्हगस नं ….।

मि ह्वाराह्वारां च्यानाच्वंगु । छे- बुॅ हे च्यानाच्वंगु ला । सीपिं जकं छथाय् मुनाः उनाच्वंगु ला । छाय् म्हनाच्वंगु जुइ म्हगस नं थुभनं । धेट् , थथे नं म्हने धयागु दैला ।
वया छकलं पिशाब याःवने हथाय् जुल । :बाथरूम वन । म्ह भचा सिचु थे जुल । बोटलं लः भचा नं हायाः त्वन । बि, देना हे छ्वये । न्ह्यः मगातकि झन मज्यू । छ्यों फुंगय् दिकःवन । न्ह्यः ला गन वं , गन वं जुयाबिल मिखा ध्वाखा हे ।
हंसराजया हानं छ्यों फुंगय् स्वचाके यन । सालूगु फांगाचा छगुलिं फायाकाल । पाचुकावंम्ह मिसाचा लिहाॅ मवःथे न्ह्यलं वयात तेज्जु याः मवल । व जुरूमुरूं हे दने थें लासाय् फ्यतुत । अतीत व बर्तमानं वयात क्वात्तुक्वाः वल । व ख्वख्वमख्व धाल । भबिश्य नं झ्वात्याहाॅ दंवल छ्याताहाॅ । छकः मूहाल ।

व लासां वाथाइथिं हे दनाछ्वत । स्वाराक्क अले ध्याकुनेच्वंगु सेफ-दराजपाखे न्ह्याः वन। ताःचा कयाकथं घाराक्कमिंक चायेकाछ्वत । अले लक्ष्मी द्यःया धुकू क्वथा चायेकल ।
नोठ प्वाॅय् प्वाॅय् पॅचिनाच्वंगु स्वस्वं वया मन भचा सिचुल । ….. .. थुलि दांला फुक्क थन हे स्वथना तयेमाः आः । गनं पिछ्वयेगु मखुत आः । थुलि ला लक्ष्मी द्यःया परसात हे जुल । लक्ष्मी हे मदयक छेय् गथे चले जुइ । संसार गथे चले जुइ । वंगु वन । तंगु तन । मयल । ब्याज न्ह्याक्व बी धाःसां मयल । लुॅया सिक्का हे उपहार बी धाःसां मयल । साॅवा हे उखेलाः थुखेलाः मदयेकाब्यूपिं बैकरत नं मनूत ला । म्ह छम्हं वायांवायां तुॅचात दायाः गनावनेमाःपिं ला -ग्वारात का उपिं ला । जनतामारा संचालकत ।
सरकार स्व , सरकार । गन दु थन ? देश गन , सरकार गन । म्हुतु छप्वाः उलाहल बल्ल । ल्हाः सनीगु गबले । तुति सनीगु गबले । झतिंगर ख्वाः ।
नोठ फुक्क प्वाॅय् प्वाॅय् हे चिनाः वं थःगु लासाय् झ्वःलिं ब्वयेहल । म्हूम्हू नोठ फुक्क छकः ल्याःख्यानाः स्वत । याकःचा पुतुपुतु हालाहल ,” थुलि ला आः छेय् हे स्वथना तयेमाः । सुचुका तयेमाः । बैंकया छु भाः । सरकारया छु भाः । छुं परय् जूसा अस्पताल ब्वाॅय् वनेमाः । दिपोजित मतयेक बिरामी भर्ना काइ मखु । अले म्वायेगु गुकथं ? …. हाहां हंसराजं नोठ फुक्क पॅपॅचिनाः लासाय् मिलय् यानाछ्वत । फुङ्गं ल्हाकाछ्वत । धिबा खनेमन्त । वयात घालय् छबः मलम पानाथे जुल ।

मतमित स्यानाः हंसराज अले लासाय् हे च्वंवन । फुॅगय् छ्यों दिकल ।
भचा हे मजावं क्वथा वया न्ह्यःसलं घुररर घुररर थ्वल !!!