१२५० अल्पकालीन श्रामणेर प्रवज्या कार्यक्रम सम्पन्न

फोटो: अशोक शाक्य

काठमाडौं / अखिल नेपाल भिक्षु महासंघ र थाई धर्मदूत भिक्षु (इण्डिया नेपाल)को संयुक्त आयोजनामा फागुन १६ गतेदेखि चैत ८ गतेसम्म २१ दिनको अल्पकालिन १२५० बृहत श्रामणेर प्रव्रज्या सम्पन्न भएको छ ।
केही नयाँ तथा केही पुराना धम्मदायादहरु २१ दिनको प्रव्रज्या ग्रहण गरी आज गृहस्थ जीवनमा फर्केका छन् ।
प्रव्रजित भई लुम्बिनीमा रहँदा उनीहरुले भगवान बुद्धले सिकाउनु भएको शिक्षा ग्रहण गर्ने, धर्मदेशना सुन्ने, मनन गर्ने, ध्यान भावनाको अभ्यास गर्ने, अरुप्रति मैत्रीभाव राखी एकआपसमा सहयोग गर्ने, साथै लुम्बिनी, भैरहवा, रामग्राम आदि स्थानमा धर्मयात्रा पनि गरेका थिए । त्यस्तै लुम्बिनी, काठमाण्डौ, ललितपुर, बनेपा, रामेछाप लगायतका स्थानीय क्षेत्रहरुमा भिक्षाटन पनि गरेका थिए ।
यसै क्रममा भिक्षु बोधिज्ञान महास्थविरको नेतृत्वमा थाई भिक्षु थावरोलगायत नेपाली एवं थाई भन्तेहरु र नवश्रामणेरहरु आज ललितपुरको पुल्चोकस्थित अक्षयश्वर महाविहारबाट नागबहाल, मंगलबजार, ओकुबहाल हुँदै थैनास्थित शाक्यसिंह विहारसम्म भिक्षाटन गरेका थिए । भन्तेहरुको भिक्षाटन मार्गमा श्रद्धावान उपासकउपासिकाहरुले यथाश्रद्धा दान गरी पुण्य गरेका छन् ।
मुलुकका विभिन्न स्थानका विभिन्न भाषा, जाति एवं धर्मका पुरुषहरु घरबार तथा पारिवारक मायामोह त्याग गरी नयाँ कुरा सिकौं, नौलो मार्गमा लागौं, मनलाई शान्त पारी विशुद्धि मार्ग लागौं भनी २१ दिनको अल्पकालिन श्रामणेर प्रव्रज्या जीवन बिताएर आज पञ्चशील ग्रहण गरी गृहस्थी जीवनमा फर्केका छन् ।
भिक्षु बोधिज्ञान महास्थविरका अनुसार केही दिनको छोटो अवधिको जस्तो देखिएपनि भगवान बुद्धको शिक्षा ग्रहण गरी कुशल कर्म गरेका कारण यसले उनीहरुका परिवार, समाजलाई कुशलतातर्फ दोहर्याउन सक्नेछ । यस अल्पकालिन प्रव्रज्याले पछि पूर्ण स्थायी भिक्षु भई बुद्धधर्ममा लाग्न प्रेरित गर्न सक्ने, आफू अनि समाज, देश तथा विश्वको हित हुने कार्य गर्न सक्नेमा उहाँ विश्वस्त हुनुहुन्छ ।
समाचार सहयोग :न्यूजअफ