मंकाः खलःया दबूछेँ उलेज्या

येँ (नेपालभाषा टाइम्स)- नेपालभाषा मंकाः खलःया दबूछेँ दने क्वचायाः शनिवाः उलेज्या जुल । मंकाः खलःया नायः लिसें जनकवि दुर्गालाल श्रेष्ठ, येँ महानगरपालिकाया उपमेयर सुनिता डंगोल व येँ मनपा १५ वडाया वडा अध्यक्ष ईश्वरमान डंगोलं मंकाः कथं रिबन चानाः दबूछेँ उलेज्या यानादीगु खः ।
येँ १५ वडाया विजेश्वर ससुख्वातय् च्वंगु मंकाः खलःया जग्गाय् येँ महानगरपालिकां दबूछेँ दना बिउगु खःसा शनिवाः छगू ज्याझ्वः यासें दने सिधःगु दबूछेँया उलेज्या लिसें मंकाः खलःयात लःल्हायेगु ज्या जूगु खः ।
ज्याझ्वलय् न्ववासें महानगरपालिकाया उपमेयर सुनिता डंगोलं दबूछेँ दनेगु तःधंगु खँ ला खः, व स्वयां नं तःधंगु खँ थन दुने छु छु ज्या यायेगु धइगु जुइमाः धयादिल । थौंकन्हय् छेँय् छेँय् नेवाः भाय् ल्हायेगु म्हो जुया वनाच्वंगु खँय् चिउताः प्वंकुसें वय्कलं थ्व क्रमयात पने मफुत धाःसा झीसं न्ह्याक्व हे भौतिक प्रगति याःसां उकिया अर्थ मदइगु बिचाः प्वंकादिल ।
वय्कलं धयादिल, ‘मांबौपिंसं गबलें न्हना मवनी कथं थः मस्तय्त बिया थकेगु धइगु हे उमिगु मांभाय् खः । मेगु ला न्ह्यागु त्वःता थकूसां छन्हु ला मदया हे वनी ।’
अथे हे नेवाः न्ह्यलुवा लिसें मंकाः खलःया संस्थापक छ्यांज्ये मल्ल के. सुन्दरं नेवाःतय्सं थःगु हे दबूछेँ धस्वाकेगु धकाः म्हगस म्हंकूगु दशकौं दयेधुंकल, नेवाः अधिकार प्राप्तीया लागिं आन्दोलन याःगु सलंसःदँ दयेधुंकल, थ्व फुक्क आन्दोलनया हे छगू उपलब्धी मंकाः खलःया थ्व दबूछेँ खः धयादिल ।
मंकाः खलः धस्वाकूपिं न्ह्यलुवात सकलें आः ज्याथ जुइधुंकूगुलिं थ्व संस्थायात न्ह्याकेगु जिम्मेवारी आः न्हूगु पुस्तां कायेमाःगु खँ नं वय्कलं कनादिल ।
येँ महानगरपालिका वडा नं. १५ या वडा अध्यक्ष ईश्वरमान डंगोलं नेवाः आन्दोलन आपालं हण्डर ठक्कर नयाः थन तक थ्यंकः वःगु खँ लुमंकुसें थ्व संस्थायात अझ च्वन्ह्याकेत आः येँ मनपा व १५ वडा ज्याकू सदां तयार दुगु खँ कनादिल ।
मंकाः खलःया नायः जनकवि दुर्गालाल श्रेष्ठया सभापतित्वय् जूगु उगु ज्याझ्वलय् मंकाः खलःया प्रवक्ता रमेशमान पिया, दुजः प्रतापमान शाक्य, राजा शाक्यपिंसं नं नुगःखँ तयादीगु खः ।
नेपालभाषा मंकाः खलःयात दबूछेँ दनेत झी कवि चित्तधर हृदयं १० आना जग्गा दान बियादीगु खःसा मेगु छपी जग्गा मंकाः खलकं न्याना तःगु खः । थ्वहे जग्गाय् येँ मनपाय् विद्यासुन्दर शाक्य मेयर जुयाः वःगु इलय् मनपाया हे बजेटं छेँ दनेगु व्यवस्था याःगु खः ।
(स्रोत:नेपालभाषा टाइम्स)