एनआरएनए अष्ट्रेलियाको निर्वाचन भोलि , नेतृत्वमा कसले बाजी मार्ला ?

एनआरएनए अष्ट्रेलियाको निर्वाचन भोलि शनिवार , नेतृत्वमा कसले बाजी मार्छ होला?

२७ जुलाई २०२३, सिड्नी/अहिले चर्चाको विषय बनेको छ गैर आवासिय नेपाली संघ (एनआरएनए) अष्ट्रेलियाको चुनावको । भोलि शनिबार नेतृत्व चयनका निम्ति निर्वाचन हुँदैछ । सन् २००५ मा स्थापना भएयता संघको १० औं अध्यक्षका लागि यस पटक निर्वाचन हुन लागेको हो भने यसपटक स्पष्ट रुपमा तीन प्यानल चुनावी मैदानमा देखिएका छन् ।

केन्द्रिय अध्यक्षका लागि उम्मेद्वारी दिएका तीनैजना प्रतिस्पधीहरु न्यू साउथ वेल्स राज्यबाटै रहेका छन् ।
दिला खरेल , देव बहादुर गुरुङ अनिल पोखरेल आआफ्नो क्षेत्रमा राम्रो प्रभाव र पहिचान बनाउन सफल व्यक्तिहरु हुन् भने कसले जित्लान् नेतृत्व भन्ने कौतुहलता भने कायमै रहेको छ ।

अध्यक्षका दावेदार रहेका तीन उम्मेदवारहरुको परिचय:

अनिल पोखरेल
तीनमध्येसबैभन्दा युवा अनिल पोखलेल पनि पेशाले सिपिए हुन् । उनले बिभिन्न कम्पनीहरुमा आर्थिक ब्यबस्थापनमा काम गरेको अनुभवसहित हाल एक अष्टेलियन कम्पनीमा फाइनान्स म्यानेजरका रुपमा काम गरिरहेका छन् । बिशेषगरी पछिल्लो २ कार्यकाल संस्थाको नेशनल ट्रेजररको पदमा रही काम शुरु गरेदेखि उनले संस्थाको आर्थिक पारदर्शिताको विषयलाई प्राथमिकतामा राखी काम गर्दै आएका छन् । त्यसैगरी, एनआरएनएलाई प्रबिधिमैत्री बनाउने, नीतिगत तहमा यहाँको सरकारसंग समन्वय गरी नेपाली समुदायको लागि ग्रान्ट लिन पहल गर्ने, युवा र विद्यार्थीका लागि बिभिन्न दुरगामी महत्वका कामहरु गर्ने र एनआरएनएलाई क्गकतबष्लबदभि ख्यगिलतभभचष्लन मोडलमा अघि बढाउने चाहनासहित उनी चुनावी मैदानमा छन् ।

देब बहादुर गुरुङ
ब्रिटीश सेनामा २० बर्ष सेवा गरी अष्टेलिया आइ यहाँको सेनामा पनि सेवा गरेर रिटायर्ड जीवन बिताइरहेका देब गुरुङ बिभिन्न सामाजिक संघसंस्था र गैरआवासिय नेपाली संघमा पनि सुरुदेखि नै संलग्न हुँदै आएका हुन् । २०१७ देखि २०१९ मा संघको सचिव, र त्यसपछि हालसम्म लगातार २ कार्यकाल संघको उपाध्यक्ष तथा न्यू साउथ वेल्स राज्य संयोजक भएर काम गरेका उनले हालसम्मका अनुभवसहित संस्थालाई अब्बल सामाजिक संस्थाको रुपमा अघि बढाउने भिजनसहित आएको बताउने गरेका छन् । यहाँको नेपाली समाजमा पूर्णकालीन समाजसेवामा लाग्ने कम नेपालीहरुमध्ये उनी एक मानिन्छन् ।

डिला खरेल
अर्कातर्फ सन् २००६ मा अष्टेलिया आएपश्चात बिद्यार्थी कालदेखि नै संस्थामा आबद्ध भइ बिभिन्न जिम्मेवारी र भूमिकामा रहँदै आएका डिला खरेल पेशाले चाटर्ड एकाउन्टेन्ट तथा फाइनान्सियल एड्भाइजर र उद्यमी समेत हुन् । उनी एनआरएनए अष्ट्रेलियाको सिग्नेचर कार्यक्रम भनेर चिनिने नेपाल फेस्टिबलमा नेपाल र नेपालीको परिचयात्मक नेपाल हाउसको परिकल्पनाकार मात्रै नभइ एनआरएनए अस्ट्रेलियाभित्र व्यवसायीको हक–हितको लागि राष्ट्रिय उद्यमी सम्मेलनको शुरुवातकर्ता पनि हुन् । एनआरएनए अष्ट्रेलियामा सन् २०१५–१७ मा कोषाध्यक्षको रुपमा काम गरेका उनले २०१७ – २०१९ को कार्यकालमा प्रवक्ताको जिम्मेवारीमा रहेर पनि काम गरेका थिए । अध्यक्षमा विजयी भएमा युवा तथा विद्यार्थीका मुद्दा सम्बोधनदेखि यहाँका उद्यमीलाई नेपालको विकाससंग जोड्ने गरी पोलिसी लेभलमा ब्यापक सुधार गर्ने उनको योजना छ ।

लगातार २ कार्यकालभन्दा बढी एउटै राज्यबाट नेतृत्वको दावी गर्न नपाउने बिधानमा ब्यबस्था भएकोले यो पटक संस्थाको नेतृत्व न्यू साउथ वेल्सले पाएमा अर्को २ कार्यकाल यो राज्यले दावी गर्न पाउनेछैन । त्यसैले पनि यस पटकको निर्वाचन न्यू साउथ वेल्स राज्यबाट नेतृत्वका आकाँक्षीहरुका लागि अझै पेचिलो बनेको छ ।

नयाँ नेतृत्वका चुनौतिहरु केके छन् ?

नयाँ तथा पुराना गरेर झण्डै एक लाख बढी नेपालीहरु अहिले अष्ट्रेलियामा सुन्दर भविष्यको गोरेटो कोरिरहेको तथ्याँक छ । एकातर्फ यहाँका नेपालीको पहिलो पुस्ताको संघर्ष र सफलतालाई अष्टेलियाको स्थानीय समुदायसम्म पुर्याउनु छ भने अर्कातर्फ नेपाल र अष्टेलिया सरकारसंग बिभिन्न तहमा सहकार्य गरी नीतिगत रुपमा सुधार गर्नुपर्ने टड्कारो आवश्यकता छ । त्यस्तै, यहाँको स्थानीय राजनीतिमा पहुँच बढाउने, नेपाली समुदायिक भवन निर्माण, दोस्रो र तेस्रो पुस्ताको नेपालीको विषय, बिद्यार्थी तथा युवाका समस्या, उद्यमी र ब्यापारीका गुनासा, लगानीकर्ताको माग अनि प्रबिधिले ल्याएको परिवर्तनसंगै यहाँका नेपालीको समयसापेक्ष जीवनस्तर सुधारका लागि एनआरएनएले धेरै कामहरु गर्नुपर्ने छ ।

हरेक २ बर्षमा हुने एनआरएए निर्वाचनमा उम्मेदवारहरुले यिनै मुद्धाहरुका अलावा संस्थाको शुद्धीकरण, सामाजिक सेवा तथा नेपाल र अष्टेलिया सरकारसंगका नीतिगत तहमा सुधारका बिषयमा बुलन्द आवाज उठाउने गरेपनि समय सापेक्ष संस्थाले यहाँका नेपालीहरुको मन भने जित्न सकेको छैन । सामाजिक गैर नाफामूलक र गैर राजनीतिक संस्थाका रुपमा दर्ता भएको एनआरएनए अष्टेलिया राजनीतिक दलको भातृ संगठनको आडमा चलेको आरोप पनि लाग्ने गरेको छ । अझै नेपालकै राजनीतिक दलको निर्देशनमा प्यानल नै बनाएर उममेद्वारहरु निर्वाचनमा होमिनुले संस्थामा समाजसेवा कम र राजनीति बढी भएको हो कि भन्ने भान हुने गरेको छ ।

यी सबै तथ्यहरुलाई आगामि नेतृत्वले चिर्न सक्नुपर्ने स्पष्ट देखिन्छ ।
आजको मूल प्रश्न आखिर कुन प्यानलले बाजी मार्ला त एनआरएनए अष्ट्रेलियामा !