नेवा: न्ह्यलुवा,कलाकार, निर्देशक गणेश सायमियात तःजिक हन

ख्याल: स्यनामि गणेश सायमिया छपा: ऐतिहासिक किपा: — ख्यालःमि गणेश सायमि निर्देशनय २०३४ साल श्रावण १५ गते शनिवार कुन्हु पद्मरत्न तुलाधारया च्वसाय् मुनासःया ग्वसालय जुगु ख्यालः कासाय् ब्वति कया: लियांल्यू सिरपा त्याकुगु ख्यालः “आ जित: नं तन तन दैवल” या ख्याल:म्व:लिसें निर्देशक गणेश सायमिया किपा ख्यालःम्वःपिं – रामलाल मानन्धर , संघरत्न शाक्य,प्रदीप मानन्धर , पन्चरत्न शाक्य , तेजनारायण सायमि (किपा: संघरत्न शाक्यपाखें)
यें/ नेवा: न्ह्यलुवा, ख्यालिम्व:, निर्देशक गणेश सायमियात वयक:या योगदानयात लुमंकुसें यें हनेज्या या:गु दु ।
गणेश सायमि हना समितिया ग्वसालय् कजि राजेन्द्रमान शाक्यया सभापतित्वय् नेपाः ब्यांक्वेट खुसिबुँइ छगू त:जिगु ज्याझ्वलय् ख्याल:मि सायमियात हंगु खः ।
जनस्तरं गठित हनेज्या समितिं नेपालभाषा ख्यालःयात च्वन्ह्याकेत वयकलं यानादीगु ज्व:मदुगु ज्याया कदर यासें बेतालिं चिइका: हनापौ देछासें सम्मान या:गु ख: ।
हना ज्याझ्व: जनकवि दुर्गालाल श्रेष्ठया मू पाहाँसुइ, बिशिष्ट पाहांपिं नेवाः न्ह्यलुवा मल्ल के सुन्दर, जनगायक भृगुराम श्रेष्ठ, मदनकृष्ण श्रेष्ठ लगायत नेवा: कला संस्कृति व राजनीति ख्य:या मनूतय् उपस्थितिया दथुइ जूगु खः ।
हनेगु झ्वलय् नेवा: ख्यःया थीथी खलः पुचः व व्यक्तिपाखें नं हनापौ व खादागा न्ययेका: वयक: गणेश सायमियात हंगु याःगु खः ।
वयकःयात केन्द्रीय मानन्धर संघ, उदाय समाज, थँहिति मानन्धर गुथि, चकना साहित्य पा:ला: सँझ्याः साहित्य पलाः, पलिस्था लगायत थीथी खलः पुचःपाखें हनापौ लःल्हा:गु ख:।
ज्याझ्वलय् अग्रज पत्रकार सुरेश किरण मानन्धरं भाजु सायमिया जीवनी बारे खँ न्ह्यब्वयादिल । अथे हे कजि राजेन्द्रमान शाक्य, लोककवि राजभाई जकःमि, येँ महानगर पालिकाया प्रवक्ता नविन मानन्धर लगायतपिसं सम्मानित जुयादीम्ह ख्याल:मि सायमिया बारे खँ तयादीगु ख: ।
गणेश सायमि नेवा: ख्याल: ख्य:या छग: थां ख: । वयक:यात जूगु हनेज्यां नेपाल भाषा ख्य: नं सम्मानित जूगु महसुस या:गु दु ।