गृहत्याग – चिबाखं

कृष्णचरण श्रेष्ठ ०३६ सालया विद्यार्थी आन्दोलनया छम्ह न्ह्यलुवा:! निदँलिपा जेलं पिहांवयेवं सरासर छेँ वन।झोला लिक्क तया: बौम्हसित तुति थिया: भागियात ।

यक्वलिपा काय् छेँय् व:गु जुया: बौम्ह दङ्ग जुल

मां गन दु ले? कृष्णचरणं न्यन

“छिमि मांया हे क्वथाय् दु, छिमि किजा नं दु” बौम्हसिनं धाल!

कृष्णचरण जेलय् लाना: गुलिचां मदुबले वया थ: मां भगवानया प्यारो जूगु ख:।थ:मांया अन्तिम संस्कारतकं यायेमखं वं।चिरमां जूसां थ:मां हे भा:पिया: नापलायेत क्वथाय् वन।

क्वथाय् थ्यनेवं कृष्णचरण झसंग वन। मांया थासय् लक्ष्मीकेशरी मचायात दुरु त्वंकाच्वंगु खन।

कृष्णचरणयात न्ह्यलय् ला ज्वलय् ला धयाथें जुल।लक्ष्मीकेशरीनं अचम्म जुल कृष्णचरणयात अन खना:।निम्हं गबेत अवाक, नि:शब्द।

थ्व गथे जुल? कृष्णचरणं बलं म्हुतु तछ्यात

लक्ष्मीकेशरीं धाल “झी द्योथाय् वना: थ:थ:गु छेँय् खबर यायेगु क्व:छिना: निन्हुलिपा हे अकस्मात छन्त चान्हय् कलेजया होस्टेल घेरेयाना: ज्वनायन । कलेज नं ताई हडताल जुल । जि छेँ वना।म्ह झ्यातुल, वाकवाक वल।मांनं जित: केलफेल यात।

“जित: छेँनं पित छ्वयामहल।याकनं लमि लगेयात। कला:सीम्ह मिजं, भचा छिपे जूसां नयेत्वनेत धन्दा मदु , दु:ख सीमखु धाल। घटनात थुलि याकनं घटित जुल, जिगु छुं लगे मजुल।”

कृष्णचरणया मिखा अंगलय् तैत:गु सिध्दार्थ गौतमया तस्बिरे लात। ताबेत स्वयाच्वन वं। ता:ईया मौनता लिपा कृष्णचरणया म्हुतुं पिज्वल “जिं थ:गु जीवन राजनीतिइ समर्पण यानागु जुल। छं छेँ व मचा सम्हाले या। छेँया वारिस नं दत, जिगु थन ज्या नं मन्त!”

सरासर क्वथां पिहांवया: कृष्णचरणं बौम्हसित धाल –

बा:या ख्वा: छक: जक स्वयेत वयागु , तसकं लिमला:, पार्टीया मिटिङ्ग दु कन्हे । खिंउँबलय् दना: वनेमा:!