हरिशंकर परसाईया निपु बाखंचा

अनुवाद बाखं

जात

    व्यभिचारं जात वनीमखु! तर ब्याहा यात कि जात वनी !

कारखाना चाल ! कर्मचारितयगु लागि आवास नं दयकल!
ठाकुरपुराया ठाकुर साहेब व ब्राम्हणपुराया पण्डितजी नं कारखानाय् ज्या या:वल​! अले छगू हे ब्लकय् च्वनेगु यात​!
ठाकुर साहेबया कायमचा व पण्डितजीया म्ह्यायमचा ल्यासेल्यायम्ह जुइधुंकूपिं! इपिं थवंथवय् नतुसुतु ब्याना: नं ब्याहा यायेगु थ्यंक क्व:छीधुंकूगु जुयाच्वन!
ब्याहाया प्रस्ताव वसेंलि पण्डितजीं धाल – थथे ब्राम्हणया म्ह्यायमचाया ब्याहा ठाकुरया कायमचालिसे गुबलें जुइफइमखु!
ठाकुर साहेबं नं लिस​: बिल – थ्व ला जुइफइ हे मखु, मेगु जातयालिसे ब्याहा यात कि जिमिगु जात वनी!
मेपिन्सं इमित सम्झे यायेत स्वल – मिसामिजं निम्हं ल्यायम्हल्यासे जुइधुंकल​! इमिगु ब्याहा यानाब्यु! ब्याहा यानामबिल कि इपिं सुला:सुला: नापलानाजुइ! समाजं थुकियात व्यभिचार धाइ!
थ्व न्यना: ठाकुर साहेब व पण्डितजीं छस्सलं धाल – जुइब्यु! व्यभिचारं जात वनीमखु! तर ब्याहा यात कि जात वनी !

*****

सुधार

संस्थाय् प्यम्ह सभापति, स्वम्ह उप​-सभापति व स्वम्ह सचिव तयेमाल​ !

जनहितया लागि स्वनात​:गु छगू संस्थाय् विरोधया स: थ्वल – संस्थाया ज्या बांलाक मन्ह्यात​! सुधार हयेमाल​! संस्था स्यनावनाच्वन! संस्थायात सुथांलाक न्ह्याकेमाल​! मखुसा संस्था हे बन्द यानाछ्वयेमाल​!
संस्थाया नायलं न्यन – सुयात सुयात संस्थाया ज्याखँय् असन्तोष दु?
झिम्ह दुजलं ल्हा: ल्ह्वन!
संस्थाया नायलं धाल – झीत सकसिगुं ग्वाहालि मा:! झीसं सकलें सन्तुष्ट जुइफयेक ज्या यायेमा:! छिकपिनि छु छु खँय् सुधार हयेमास्तेव​: धयादिसँ!
असन्तुष्ट झिम्ह दुजलं थ:थवय् सहलह याना: सल्ला बिल – संस्थाय् प्यम्ह सभापति, स्वम्ह उप​-सभापति व स्वम्ह सचिव तयेमाल​!