भानु बोखिमले प्रकाशनमा ल्याए “गोधुली गीत”

रन्जु श्रेष्ठ ,काठमाडौं / लेखक भानु बोखिमको दोस्रो कृतिका रूपमा “गोधुली गीत” नामक उपन्यास लोकार्पण गरिएको छ ।
काठमाडौंको मण्डला थियटरमा एक कार्यक्रमका बीच उक्त पुस्तक विमोचन गरिएको हो।
माओवादी सशस्त्र द्वन्दको पृष्ठभूमिमा लेखिएको “गोधुली गीत”मा सशस्त्र द्वन्द्वमा सहभागी भएका एक योद्धाले देखेको सामान्य सपनालाई लिएर अगाडि बढाइएको छ ।

कवि श्यामल, आख्यानकार नवीन विभास र कवि नरेन्द्र कुमार नगरकोटीले किताब विमोचन गरेका थिए ।
कार्यक्रममा साहित्यकार श्यामल र नवीन विभासले पुस्तकको टिप्पणी गरेका थिए। त्यस्तै, कार्यक्रममा पुस्तकबारे लेखक बोखिमसँग पत्रकार दीपक सापकोटाले संवाद गरेका थिए।
ताप्लेजुङको सिकैचामा जन्मेका भानु बोखिममा बीबीसी रडियोबाट सञ्चालित कथा मिठो सारँगीको प्रस्तोताको रूपमा काम गरेको अनुभव छ । बोखिमको पहिलो प्रकाशित कृति ‘रुमानी साँझ’ २०७४ मा प्रकाशित भएको हो भने दोस्रो कृति ‘गोधूलि गीत’ उपन्यान्स आज आज विमोचन गरिएको हो । “गोधुली गीत” उपन्यासमा रोल्पाको मगरको छोरी ईश्वरी मगरलाई मुख्य पात्रको रूपमा र भोजपुरको दिल बहादुर राई लगायतलाई सहायक पात्रको रूपमा प्रस्तुत गरेर सशस्त्र द्वन्दले पारेको असर, अनुभव र अनुभूतिहरूलाई समेट्ने प्रयास गरिएको देखिन्छ ।
कलम प्रकाशनले बजारमा ल्याएको यो पुस्तक बिमोचनसँगै लेखकको हस्ताक्षर सहित पुस्तक किन्नेहरुको लहर लागेको थियो । पुस्तकको मूल्य ६९५ रुपैयाँ रहेको छ।