टोरोन्टो विश्वविद्यालय् “गृष्मकालिन नेपालभाषा प्रशिक्षण” ज्याझ्वः

टोरोन्टो बिश्वबिद्यालयस “गृष्मकालिन नेपालभाषा प्रशिक्षण” ज्याझ्वः

टोरोन्टो,क्यानाडा / टोरोन्टो बिश्वबिद्यालय धर्म अध्ययन बिभागया ग्वसालय् निवाःयंक न्ह्याःगु “गृष्मकालिन नेपालभाषा प्रशिक्षण” ज्याझ्वः क्वचागु दु । अनलाइन तथा प्रत्यक्ष माध्यमपाखें न्ह्याकूगु उगु प्रशिक्षणय् अमेरिका, क्यानडा लगायत थीथी देय्या याना स्वीम्ह प्रशिक्षार्थीपिनिगु ब्वति दुगु खः ।

उगु ज्याझ्वलय् नेपालभाषाया प्रसिद्ध मिसा साहित्यकार श्रीलक्ष्मी श्रेष्ठ, नेपाल भाषायाहे साहित्यकार, अनुसन्धाता एबम मानबशास्त्री डा. बालगोपाल श्रेष्ठ र टोरोन्टो बिस्वबिद्यालय धर्म अध्ययन बिभागया प्रमुख प्रा.डा. क्रिस्टोफ एम्रिकं कथहं आधारभूत बार्तालाप, आधुनिक साहित्य व परम्परागत (क्लासिकल) भाषा बिषयलय् प्रशिक्षण बियादीगु खः ।

उगु प्रशिक्षण ज्याझ्वःया लिपांगु इलय् प्रशिक्षार्थीपिन्त नेपालभाषाया इतिहास व संघर्ष बारे जानकारी बिइगु आज्जु तयाः “अस्तित्वका लागि संघर्ष; नेपालभाषा साहित्यया इतिहास” बिषयलय् डा. बालगोपाल श्रेष्ठं प्रबचन बियादीगु खः । वयकलं थःगु प्रवचनया झ्वलय् मल्लकाल सिवें न्हापा नं गोपाल बंशाबली नेपालभाषाया भुजिंमो लिपि न्ह्योथनातःगु व लिपा प्रताप मल्लया पालाय् हनुमानध्वाखाय् च्वंगु शिलालेखय् स्पष्टरुपय् नेपालभाषा उल्लेख जुयाच्वंगुलिं प्रमाणित जूगु खँ कनादीगु दु ।

वयकः भाजु श्रेष्ठं थःगु प्रवचनया झ्वलय् पुनर्जागरण कालय् राणा शासनया ईलय् नेपालभाषाया स्रस्टापिन्त जेलनेल तथा सम्पति जफत याना दुःख बिउगु इतिहास दु धयादिसें थुकिया बाबजुद नं काराबास कालय् नेपालभाषाया कृतित तथा संस्थात जन्मे जूगु खँ उलादीगु दु । उगु प्रबचन ज्याझ्वलय् टोरोन्टो बिस्वबिद्यालयया प्रा.डा. क्याथरिन रायन्किन, डा. अलाना सौजा, डा.पुष्प आचार्य, ईयन टर्नर,टोनि स्कट, मधुसुदन रिमाल, उत्तम माकःजु लगायतपिन्सं थःथःगु जिज्ञासा तयादीगु खः । उगु जिज्ञासायात प्रस्तुतकर्ता डा. श्रेष्ठं लिसः बियादीगु खः ।

ज्याझ्वःया समापनय् उत्तम माकःजुं उगु प्रशिक्षण ज्याझ्वः टोरोन्टो बिस्वबिद्यालय धर्म अध्ययन बिभागया प्रमुख प्रा.डा. क्रिस्टोफ एम्रिकया सक्रियताय् न्ह्याःगु खँ कनादीगु खः । थुगु ज्याझ्वलं टोरोन्टो बिश्वबिद्यालयया ब्वमिपिं व मेपिं जिज्ञासुपिन्त नेपाल भाषाया प्रचार प्रसारय् योगदान जूवनिगु विश्वास नं काःगु दु । ज्याझ्वलय् प्रा.डा. क्रिस्टोफ एम्रिकं नेपालभाषाया छुं कृतित अंग्रेजी भाषाय् अनुबाद यानाच्वंगु ज्याया प्रशंसा नं यानादीगु दु ।

सुगत रत्न सिन्दुराकार