सिड्नी नेपाल भाषा कक्षा व हुलाप्याखं स्यनेज्या

क्याम्प्सी , सिड्नी/ गुथि अस्ट्रेलियाया ग्वसालय् सिड्नी नेपाल भाषा स्यनेगु कक्षा न्ह्यानाच्वंगु दु ।
स्यनामि श्याम सैंजुया संयोजकत्वय् नेपाल भाषा व प्रचलित नेपाल लिपिया कक्षा न्ह्यानाच्वंगु ख: ।
क्याम्प्सीया छगू चर्चया हलय् जुयाच्वंगु थुगु भाषा व संस्कृतिया कक्षा शनिबा: पतिकं न्ह्याकावयाच्वंगु दु । थुकी अभिभावकपिं व मस्तयय्गु नितिं अलग अलग कक्षा न्ह्यानाच्वंगु दु । ” जिपिं पूर्ण रुपं स:पिं ला मखु अथे जूसां विभिन्न माध्यमं सयेकु सयेकुं भाय् स्यनेज्या न्ह्याकावैच्वना” स्यनामि अले संयोजक श्याम सय्जुं कनादी।

श्याम सैंजुया म्ह्याय् मय्जु सरिना सैंजुं नं हुलाप्याखं स्यनाच्वंगु दु ।
सरिना अस्ट्रेलियाया छगू संकिपा “सर्भाइभ अर डाई” संकिपाय् “माया” नांया महत्त्वपूर्ण पात्रया भूमिका म्हितादीम्ह कलाकार नं जुयादी ।

सिड्नी यक्व नेपाली त दु उकी नेवा:तय् उपस्थिति नं यक्व हे दु ।
गुथि अस्ट्रेलिया थुगु देशय् पलिस्था जूगु सुरुया नेपाली संस्थात मध्ये ला: व: । गुथि अस्ट्रेलियां थन नेवा: नख: चख: हनेगु निसें नेवा: भाषा संस्कृति ख्यलय् महत्त्वपूर्ण ज्याझ्व:त न्ह्याकाव:गु दु ।