नेवाः एकता दिवस तःजिक हन

यें/झिंस्वक्वःगु नेवाः एकता दिवस परम्परागत थाय् बलम्वुइ ने.सं. ११४३ पोहेलाथ्व नवमी पुष १६ गते शनिवाः तःजिक हनेगु याःगु दु । नेवाः देय् दबूया नायो पवित्र बज्राचार्यजुया सभानायोसुइ न्ह्याःगु थुगु दिवसया सभाय् नेवाः न्ह्योलुवा उमेश स्थापितं नेवाः एकता दिवसया औचित्ययात कयाः थःगु नुगः खँ तयादीगु खः । वयकलं थःगु खँया झ्वलय् झीत राज्य सत्ताय् च्वंपिन्सं क्वतेलेगु ज्या याःगु दु । उकिं झीत राजनीतिक अधिकार माःगु खँय् बः बियादीगु दु धकाः धयादीगु दु ।

नेवाः देय् दबूया नायः लिसें झिंक्वक्वःगु नेवाः एकता दिवसया मंकाः संयोजन पुचःया कजि पवित्र बज्राचार्यसहित थीथी खलः पुचलं मू व्यत्तित्वपिं मुना बलम्वुया थीथी थाय् चाहिला र्‍याली न्ह्याकेगु याःगु खः । नेवाः स्वायत्त राज्यया ध्वायँ ज्वनाः सांस्कृतिक बाजं लिसे जुलुसय् आपालं नेवाःतसें थः नेवाः जुयागु गर्व तायका ब्वति कायगु याःगु् खः ।

नेवाः एकताा दिवसया सभाय् देय्या राष्ट्रिय म्ये, नेवाः राष्ट्रिय म्ये हाला सम्मान बिइगु नं याःगु उगु ज्याझ्वलय् थीथी वक्तापिन्सं नेवाः एकता दिवसया विषय व नेवाः, आदिवासीया सवालयात कःघाना थःथःगु नुगः खँ तयादीगु खः । थुकथं नुगः खँ प्वंकेगु झ्वलय् चन्द्रागिरी नगर पालिकाया उपप्रमुख बसन्ती श्रेष्ठ आदिवासी जनजाति महासंघया नायो क्याम्सेर शेर्पा,

नेपाल आदिवासी आयोगया नायो राम बहादुर थापामगर, वागमती प्रदेशया सभासद रमा आले मगर लगायत वक्तापिन्सं थःथःगु नुगः खँ तयादीगु खः । बलम्वुया थीथी त्वाःया द्धारे व पाहांपिन्सं नेवाःत समान खः थःजात क्वःजात मदु धैगु प्रतिवद्धता नं प्वंकेगु ज्या याःगु खः । उगु चन्द्र गिरी नगर पालिकाया मेयर घनश्याम गिरीं छ्वया हयादीगु भिंतुना सन्देश नं ब्वना न्यंकादीगु खः ।

उगु ज्याझ्वलय् लोककवि राजभाई जकःमिं नेवाः एकता दिवसया विषयवस्तुयात कःघाना च्वयातःगु चिनाखँ नं ब्वना न्यंकादीगु खःसा बलम्वुया थीथी सांस्कृतिक व संगीतकःमिपिन्सं म्ये हाला व हुलाप्याखँ ल्हुला क्यनेगु नं याःगु खः ।

उगु एकता दिवसया ज्याझ्वलय् नेवाः अस्तित्व नाप स्वागु संगीतकःमि म्ये नं हाला न्यंकेगु याःगु खःसा थीथी सांस्कृतिक ब्वज्या धुँन्या ब्वज्या न्ह्यब्वःगु खः । नेवाः देय् दबू स्वनिगः विशेष समितिया कजि श्रीकृष्ण महर्जनं न्ह्याकादीगु थुगु ज्याझ्वलय् लोकतान्त्रिक नेवाः संघया नायो भगवान शाक्यं बलम्वु घोषणा पात्र नं जारी यानादीगु खः ।

उगु ज्याझ्वलय् ज्याझ्वःया सभापतिया थासं नेवा देय् दबूया नायो पवित्र बज्राचार्यजुं थःगु न्वचुया झ्वलय् “नेवाः एकताया महत्वयात थुइका थुकथं आपालं नेवाःत सहभागि जूगु खः । नेपाः धैगु हे नेवा जुया खः । उकिं नेपाःयात ल्यंकेत नेवाः सभ्यता ल्यंका तय्माःगु दु । हाकनं छकः झीत तायाच्वंगु दु झी दनिगु भाव । झीगु भाषा, झीगु संस्कृति, सभ्यता म्वाका तय्गु धैगु हे झीगु सहभातिा मुलक प्रतिवद्धता खः” धकाः धयादीगु दु । वयकलं नेवाःतयगु संस्कृति, सम्पदा सभ्यता ल्यना च्वंसा हे जक नेवाः नेवाः तयगु अस्तित्व दयाच्वनीगु धारणा पितबियादीगु खः ।

वनेवाः एकता दिवसया झ्वलय् बलम्वुइ रन्जना लिपिया क्यालिजात्रा नं जूगु खः । थुगु क्यालि ज्यात्राय् बलम्वुया मिसापिन्सं रन्जना लिपिं मनूतयगु नां च्वया बिइगु याःगु खः ।

ऐतिहासिक नापं सांस्कृतिक कथं महत्वं जाःगु चन्द्रागिरी नगरपालिका वडा ल्याः १२ या नेवाः वस्ती बलम्बुइ उगु दिवस हनेगु याःगु खः । थुुगु नेवाः एकता दिवसयात कयाः पुष १३ गते बुधवाः बलम्बुइ पत्रकारतलिसे नापलाय्गु ज्याझ्वलय् नेवाः देय् दबू चन्द्रागिरी नगर समितिया नायो नारायण महर्जनं पुष १६ गते आपालं सांस्कृतिक बाजा नापं स्वनिगःया थीथी लागां द्वलंद्वः नेवाःत गुर्जुधाराय् मुना सांस्कृतिक बाजालिसें जुलुस पिकया बलम्बुइ वनीगु जानकारी बियादी कथं थुकथंया मुना ज्याझ्वः जूगु खः ।

पुष १३ गते जूगु पत्रकार सम्मेलनय् नेवाः देय् दबू चन्द्रागिरी नगर समिति नायो नारायण महर्जनं प्रेस विज्ञप्तिइ वाचन यानादीगु खःप्सा उकिइ ‘थुगुसी झिंस्वक्वःगु नेवाः एकता दिवस तःजिक हनेगु नितिं नेवाः देय् दबू चन्द्रागिरी नगर समिति व ज्यापु महागुथि चन्द्रागिरी नगर समितिया स्थानीय व्यवस्थापन व स्थानीय संयोजनय् जूवनाच्वंगु दु । नेवाः देय् दबू केन्द्रया संयोजनय् नेवाः स्वायत्त राज्य मंकाः संघर्ष समितिइ दुथ्याःगु घटकत, नेवाः समाजया थीथी जातीय संघसंस्था, नेवाः अभियान न्ह्याका वयाच्वंगु संघसंस्था नापं दुथ्याका झिंस्वक्वःगु नेवाः एकता दिवस हना मंकाः ग्वसाः खलःया ग्वसालय् जूवनाच्वंगु दु ।

बलम्बुइ जुइगु नेवाः एकता दिवसय् स्वनिगःया गांगामं, शहर शहरंनिसें वस्तीवस्तीं तकं नेवाःत थःथःगु पहिचानसहित सहभागी जुइ । संघीय लोकतान्त्रिक गणतन्त्र नेपाः दुने पहिचानया आधारय् नेवाः स्वायत्त राज्य सुनिश्चित यायगु हे नेवाः राजनीतिक आन्दोलनया मू आज्जु खः । नेवाः स्वायत्त राज्य मंकाः संघर्ष समितिया ग्वसालय् नेपाल संवत ११३० पोहेलाथ्व नवमीया दिनय् येँया दशरथ रंगशालाय् लखौंलख नेवाःत मुना जनस्तरपाखें नेवाः स्वायत्त राज्य घोषणा याःगु खः ।

थिमिया बोडेय् जूगु नेवाः राष्ट्रिय राजनीतिक सम्मेलनया क्वःछिना कथं नेवाः दुने परम्परांनिसें दयाः वयाच्वंगु जातीय, क्षेत्रीय, सांस्कृतिक, धार्मिक अनेकता व विविधता दथुइ एकता क्वातुकेत पोहेलाथ्व नवमीया न्हिइ लाका नेवाः एकता घोषणा याःगु खः । थ्वहे ऐतिहासिक न्हियात लुमंकाः दँय् दसं पोहेलाथ्व नवमीकुन्हु नेवाः एकता दिवस हनाः वयाच्वंगु जुल ।

नेवाः एकता दिवसं नेवाःतय्त एकता यायगु, नेवाः भाषा, कला संस्कृति नापं नेवाः सभ्यताया नितिं मंकाः सः थ्वयकेगु जुइ । अन्तर्राष्ट्रिय श्रम संगठन अभिसन्धि १६९ (आइएलओ १६९) नापं आदिवासी अधिकार सम्बन्धी संयुक्त राष्ट्र संघीय घोषणा पत्र (युएनडिपी २००७) लगायत थीथी अन्तर्राष्ट्रिय सन्धी महासन्धीपाखें आदिवासीतय्त बियातःगु अधिकार सुनिश्चित याना कार्यान्वयन यायेमाः, भाषा आयोगया सिफारिस कथं वागमती प्रदेशय् नेपालभाषायात कामकाजी भाषाया रुपय् कार्यान्वयन यायेमाः, स्वनिगलय् आदिवासी नेवाःतय्गु वसोवासया समस्या समाधान यायेमाःगु नेवाःतय्गु सामुहिक भूमि, नेवाः संस्कृतिनाप स्वानाच्वंगु भूमि रक्षा यायेमाःगु नापं समग्रतय्त नेवाः भूमियात रक्षा यायेमाःगु सः थ्वयकेगु याइ । थुगु ज्याझ्वलय् नेपाल आदिवासी जनजाति महासंघया नेतृत्व, आदिवास जनजाति आयोगनिसें भाषा आयोगया प्रतिनिधि तकं सहभागी जुइ ।’ धकाः खँ न्ह्योथनातःगु खः ।

नेवाः देय् दबू चन्द्रागिरी नगर समिति व ज्यापु महागुथि चन्द्रागिरी नगर समितिया मंकाः ग्वसालय् उगु पत्रकार सम्मेलन जूगु खः । ज्यापु महागुथि चन्द्रागिरी नगर समितिया नायो धनवीर महर्जनं लसकुस न्वचू बियादीगु उगु ज्याझ्वलय् चन्द्रागिरी नगरपालिका वडा ल्याः १४ या वडाध्यक्ष राजभाई महर्जनं नेवाः एकता दिवसका नितिं नगरपालिकां सहकार्य याःगु दु धयादिसें थुगु दिवस चन्द्रागिरी नगरपालिकाय् याय्दुगु तसकं लसताया खँ खः धकाः धयादीगु खः ।

उगु पत्रकार सम्मेलनय् नेवाः देय् दबू स्वनिगः विशेष प्रदेशया नायो श्रीकृष्ण महर्जनं नेवाः एकता दिवसया थीथी पक्षयात कुलादिसें झिंस्वक्वःगु नेवाः एकता दिवस गुगु कथं जूवनाच्वंगु दु धकाः देय् न्यंकंया नेवाःत नापं मेमेपिन्सं च्यूताः तयाच्वंगु दु धयादीगु खः ।

सुगत रत्न सिन्दुराकार