गुलाफ व सिमा ह: ! (चिबाखँ)

रिता महर्जन

जिपिं निम्ह थौं द्यइथाय् वनाः पुज्याना। पुजा क्वचायेवं जिं वैत सिन्हः तिकाबिया, अले ह्याउँगु गुलाबया स्वां छफ्व: बिया। वैत ह्याउँगु गुलाबया स्वां तसकं य: उकें जिं इलय् ब्यलय् ह्याउँगु गुलाबया स्वां वैत बियाच्वना।
जिपिं लिहां वैच्वना। लँपुइ वं नं जित: छन्त जिं छु बिये? थ्व हे वंगल सिमां कुतुं वैच्वंगु वाउँसे च्वंगु ह: छहःसां छन्तभनं ल:ल्हानाः जिगु ल्हातय् तैबिल। जिगु लसता भय्‌बिल । wow thanks जिं धया। न्ह्यागु हे जुइमा, मायां ब्यूगु न्ह्यागुं चिज जिगु निंतिं त:धं । अय्‌न वं जित: न्हापांखुसी ब्यूगु धैगु थ्व हे वंगल सिमाया ह:। उकें थ्व मतिनाया चिं जिगु निंतिं तसकं तःधं जुल ।
जिं वैत धया– जिं बियागु थ्व स्वां छेँय् यंकाः गिलासय् ल: तयाः उकी चि छप्ति तयाः तैति न्हां । वं ज्यू धाल। जिं नं वंगल सिमाया ह: छगू जूसां वैगु लुमन्तिभनं गिलासय् ल: तयाः थ:गु क्वथाया टेबुलय् तैतया।
न्हिं बिनावन। छन्हु क्याम्पसय् जाँच व:गु हुनि वं जिगु सफू ब्वनेत काल। सफू फततत पुइकल । सफूदुने वंगल सिमाया ह:। थ्व छु वं न्यन। का…….. गजाःम्ह मनू ? ल्वःमन ला? छं बियागु मखुला जित: उखुन्हु द्यइथाय् पुज्याः वनाबलय् । ओहो….. ख: ला जिं ला ल्व: हे मनेधुंकल का…..। अले छं जिं बियागु गुलाबया स्वां छु यानातया ले? छ ला ह्याउँगु गुलाबया स्वां तसकं य:म्ह। जिं ला ग्व:क्वःमछि बी नं धुन। व अक्कमक्क जुल । अय्‌नं धाल, जित: य: गुलाबया स्वां अय्‌न छेँय् थ्यनीबलय् व स्वां जिगु ल्हातय् दै मखुत । मस्यु गन कुतुं वनीगु ख:। जिगु मिखाफुसि मचायेकं कय्‌कुन। नुगलय् तंया दासिवल, अय्‌नं याउँसे च्वंक धया।
अय्‌सा छन्त गुलाब स्वां य:गु मखु, ह्वैच्वंगु स्वां खना: छ आकर्षित जक जूगु ख:। आकर्षित जुइगु व य: धैगु खँ तसकं पा:। छं ब्यूगु थ्व ह: छहः नं जित: तसकं य:गु हुनिं जिं सफूदुने तयाः सचय् यानातया तर छं ला गुब्लय् स्वां गनावनी उब्लय् छंके व आकर्षण नं तनावनीगु खनी। अले जिं बिया:गु स्वां तक नं गन कुतुं वन छं लुमं मजुइगु खनी। य: धैगु व छुं वस्तु खना: आकर्षित जुइगु पा:। जिं वैत थुलि जक धयाः अले जिगु सफू ज्वनाः जि थ:गु लँपु लिनावना।