छम्ह मिसा गथे पीडित जुइ ?

रिता महर्जन

छम्ह मिसा गुब्लय् पीडित जुइ? धात्थें धायेगु खःसा थौंकन्हय् सामाजिक सन्जालय् छुं नं कथंया मिसा पीडित जुल धैगु खँ भिडियो मार्फत बय् बय् जुयाच्वंगु स्वयेगु दु व न्यनेगु दु। सामाजिक सन्जाल मार्फत पीडित जू धैपिं गुलि मिसातय्‌त न्याय जूगु जुल जुइ? तर जिं थन न्ह्यथने त्यनागु पीडित मिसात न सामाजिक सन्जालय् वयेफुपिं ख: न समाजय् तक नं थ:गु इज्जतं यानाः सुयातं क्यने फुपिं ख: ! मात्र छेँय् दुने थ: पीडित धैगु खँ सुचुका च्वंपिं मिसात ख: ।
गन अभाव जुइ अन ल्वापु अवश्य नं जुइ। छगू देय् सुथां लाकेत बांलाःम्ह राष्ट्रसेवक माः, समाज भिंकेगु खःसा अन त्वा:या नायः भिनेमाः अले परिवार गतिशील व अनुशासनय् तयेत छम्ह भिंम्ह हामा माः। हामा जुयाः थःगु कर्तव्य पूरा याये मफुसा अन परिवार परिवार मखुसे व्यक्ति व्यक्ति जक म्वानाच्वंगु दै । गन सुयातं सुयागुं च्यूताः दै मखु ।
थौंकन्हय् थ्व राजधानी दुनेसं अप्वः धै थें फुटपाथे ब्यापारी मिसात खना वैच्वनागु दु। हाइवे पाखेया खुसिया सिथय् मचायात कघानाः दुरु त्वंकु त्वंकुं छम्ह मिसा ल्वंचात तछ्याना च्वंगु खनेदु। थथे जूपिं अप्व: मिसातय् गुलिं थ: मिजनं त्वःतावंगु बाय् गुलिसिनं मिसातय्‌त छगू तृप्तिया साधन भाःप्यूगु हुनिं थ: हे जिविकोपार्जन याना नयेभनं मिजंतय्‌त त्वःता: वःपिं मिसात दु धैगु थी थी सामाजिक सन्जालपाखें खना वैच्वनागु हे दु। थुलि परिश्रमी मिसात सायद थ: मस्तय्‌गु प्वा: सुकुचिनी धका: मखु ला जुइ थथे परिश्रम याना जूगु? न्हिच्छि ज्या यानाः बहनी मस्तनापं जा छप्यय् नयेत संघर्ष यानाजूम्ह छम्ह मांयात मेगु तःधंगु लसता छु जुइ?

थ्व जुल थ: मस्त द्यांलाइभनं संघर्ष यानाः नइपिं मिसात । संघर्षरत मिसातय्‌त सकसिनं सम्मान याये नं माः। मेगु छथ्वः मिसात दु गुपिं थ: परिवारया इज्जत धाधां न छेँ थासं पिहां वयेफु न विरोध हे यायेफु। छेँ दुने च्वँच्वं थुलि सहः यानाच्वनी इमिसं, लिपाया ई उपिं डिप्रेशनया सिकार जुइ। थथे मिसात डिप्रेशनय् छ्वैपिं अप्व: धै थें मिसाया थ: मिजं हे ख:। थन समाजय् थजाःपिं मिजंत नं दु गुम्हेसिनं थ: कलाःयात छगू ज्या याइम्ह मेसिन तायेकी। व कलाःयात सम्मान बी मफुसा व मिसाया जिन्दगी स्यंकेगु नं वैगु छुं अधिकार मदु। तर थ्व खँ न्यनीगु सुनां?
व मिजं गुम्हेस्यां छम्ह मिसायात समाजय् सम्मान बी मफु, व हे मनुखं समाजय् निपाः ख्वा:पाः पुयाः सम्मानित जुयाच्वनी। थ्व हे फुस्कुलुगु इज्जतं यानाः छम्ह मिसा डिप्रेशनय् वनी अले व हे मिसायात थ्व हे सामाजं हाकनं अवहेलना याइ ।
थौं थ्व नीछगूगु सदी स्वयेगु खःसा मिसात सिबें मिजंत नं पीडित जुयाच्वंगु खनेदु। ८०% मिसात सिबें मिजंतय्‌सं थ:गु ज्या यानाः जिम्मेवार बोध जुयाः थ: परिवार बांलाक न्ह्याकाच्वंगु नं दु। उपिं मिजंतय्‌त सलाम बी हे माः । तर नकाबधारी अजाःपिं २०% मिजंतय्‌सं यानाः २०% हे मिसात छेँय् दुने पीडित जुयाच्वनी। गजब ख: थ्व समाज व परिवार गुम्ह छेँय् दुने च्वनाः नं पीडित जुयाच्वंपिं मिसातय्त न्याय बी मफु। उकें ला धाइगु तक नं दु।बोल्नेको पिठो पनि बिक्छ नबोल्नेको चामल पनि बिक्दैन !   किपा : साभार