ऐतिहासिक विराट नेपालभाषा साहित्य सम्मेलनया ६१ संस्करण क्वचाल

ख्वप/ नेपालभाषा साहित्यया ख्यलय् इतिहास क्वबुया निरन्तर रुपं न्ह्याना वैच्वंगु विराट नेपालभाषा साहित्य सम्मेलन त:जिक जूगु दु । थ्व बिराटयाया ६१क्व:गु साहित्य सम्मेलन ख: ।
न्हू पुलांपिं साहित्यकारपिसं बाखं ,चिबाखं व कविता विधाय् थःथःगु रचना न्यंकेगु ज्या जुउगु साहित्य सम्मेलनय् बाखं /चिबाखं पाखे नरेश अमात्य न्हाप ला:गु ख:सा ल्यू ज्ञानीराजा मानन्धर व लियां महर्जन रत्न “लूनिभां:” सिरपा त्याकेत ताःलागु ख: ।
चिनाखं पाखे न्हाप रामेश्वर मिश्रण श्रेष्ठ, ल्यू दिलकुमारी डंगोल व लियां ल्यू ज्ञानेन्द्ररत्न बज्राचार्य लाःगु ख: ।
भाषाख्यःया न्ह्यलुवा हितकरवीर सिं कंसाकार मूपाहाँ कथं झायादीगु उगु सम्मेलन विराट गुथिया नायः महेन्द्र गोपाल कर्माचार्यया सभानायसुइ जुगु खः । ज्याझ्वलय् विराट गुथिया न्वकु महेन्द्र लाल कायस्थं लसकुस यानादिल ।
मूपाहां हितकर वीर सिंह कंसाकारं थ्व ईन्टरनेटया युगय् साहित्य सम्मेलन छाय् याये माल धैगु खँय् थज्या:गु ज्याझ्वंलं भाषा साहित्य विषयलय् खँ तयेगु न्यनेगु वातावरण बने जुइ गुकिं भाषा साहित्यया विकास जुइ धैगु खँ तयादिल । पंचायतया कथिन इलय् यक्व संघ संस्थातयसं थुकथं ज्या या:गु ख: तर ४६ सालया परिवर्तन लिपा खुल्ला जूबलय् थुकथंया ज्याझ्व: म्ह्व: जुयावंगु दु:खया खं जूगु कनादिल । अथे हे बिराटया निरंतरताया वयकलं प्रशंसा यानादिल ।
दाँभरीं राम गोपाल चगुथिं सुभाय् देछागु उगु ज्याझ्वलय् विराट या त्रिरत्न शाक्यं सिरपा त्याकुपिनिगु नां घोषणा यानादिल ।
वहे ज्याझ्वलय् एस ई ई परिक्षाय् नेपालभाषा विषय कया दकलय अप्व: ल्या ह:म्ह पुर्णिमा तुलाधरयात नं हनेज्या जुल । अथेहेतुं नेपालभाषा साहित्यख्यःया नां जाम्ह कवि पुर्ण वैद्यया तिरिमयजु मिरा बैद्यं झिगुलखतकाया अक्षय कोष निस्वनादीगु दु । उकिया नापनापं वयकलं नेपालभाषा ख्यलय् बिउगु ज्वमदुगु योगदानयात मुल्यांकन याना छगू लखतका या सिरपा बिइगु खँया नं घोषणा याना दिल ।
विराट नेपालभाषा साहित्य सम्मेलन गुथि पाखें साहित्य बिधाया सर्जकयात दँय् दसं छगू लख तकाया सिरपा बिइकथं झिगु लख तकाया अक्षय कोष या नापनापं विराट या छेँ दयेकेत निगु लखतका नापं याना मुक्कं झिंनिगू लख तका बियादीगु खः ।
ज्याझ्वलय् यक्व साहित्य ह्यमिपिनि ब्वति दुगु ख: । देंगु महामारीया कारणं गुलिखे श्रष्टापिं धा:सा थ्यंके मफुगु ख: ।