पुइका: यंकुगु स्वापू

चिबाखं : पुइका: यंकुगु स्वापू

सुधीर ख्वबि

छन्हु, छ्गू स्वांक्यबय् गुबलेसं मव:निम्ह छ्म्ह बांला:म्ह लापाचा दुहाँवल । वयात दक्वसिबे न्हापां सितु घाँय् नं लसकुस यात । पासा कुलिचिन । निम्ह तसकं लयेता: न्हिच्छी नापनापं जुल । ख्या:याना जुल ।न्ह्याइपुक चा:हिल । सितुघाँयला मक्ख । लापाचिगु लागि न्ह्यागु नं यायेत तयार । याना न क्यन । स्वांक्यबया मेमेगु स्वांत इपिं खना अजू नं चाल।
तन्हु हे दत । लापाचां सितुयात नापला: मव:गु । छाय् ख: छु जुल वं छुं हे मसिल । लापाचिया लुमन्तिं सितुघाँय् गना:वन । वाँगु दक्व थ्वयावना भुइसे च्वन ।
छ्न्हु सितुघाँयनं लापाचित: गुलाफ स्वांमाय् चा:हुलाच्वंगु खन । गुलाफ स्वांया मुलय् च्वना खँ ब्याका:च्वंगु नं खन । व वना नं तुइत: स्वल । ‘तारेमाम म्हंफुला’- धका: न्यन । लापाचिया छुयाये मयाये जुल । जि पलख लिमला: । कन्हय् नापलाना खँल्हाये धाल ।

निन्हुप्यन्हु बित । तर लापाचां स्वापू मत: । सितुं मनय् खँ वायेकाच्वन ।

छन्हु गुलाफ स्वां नं सितुघाँय् याके न्यंवल । थौंकन्हय् लापाचा खनेमदु । छाय् ख: स्युला?
सितुघाँय् नं – ‘जिं नाप मला:गु नं यक्व दत’- धया लिस: बिल । गुलाफ स्वांया ख्वा:ख्युँसे च्वन । उबले लाक्क नापसं ह्वयाच्वंम्ह तकुस्वां नं प्याच्च नंवात -‘व लापाचिया चिन्ता छाय् कयाच्वनागु छिमिसं ? व ला गुबलें पलेस्वां नापं गुबलें गुनाकेरा स्वां नापं , गुबले गन, गुबलें सुलिसे वनिम्ह नि छिमिसं मस्यूला ? । व लापाचाला मखु मिसा भम्ब ख: नि छिमिसं सि हे मस्यु वयागु तालबाल । वयागु लागि गन फाइदा जुइ, अन ब्वाइम्ह, गन ल: वन अन हे न्ह्याइम्ह ।
गुलाफ स्वां व सितुघाँय् निम्ह वाल्ल जुल । उबलय् फसं पुइकेगु सुखुगंगु ह: नं इमिगु खँय् लिसा तन – ‘थौं व लापाचा ला सुर्जमुखी स्वांलिसे म्हिता: च्वन प:खालं किका । ख्वा: बांला: ताल बांमलाम्ह लापचा ख: व । इलय् म्हसिका बचे जु न्हाँ धा धां हे व ह:यात हाकनं फसं पुइका यंकल ।
सितु घाँय् , गुलाफस्वां व तकुस्वां पुइका: यंकुगु ह: जक मखु स्वापू नं पुइका यंकुगु स्वयातुं च्वन ।