नेपाल भाषा मिसा खल:या ३३ क्व:गु बुदिं हन

यें/  ने.सं. ११४२ गुँलागा ७ (जन्माष्टमी) शुक्रबार, जगतसुन्दर ब्वनेकुथि, लखुतिर्थय् नेपाल भाषा मिसा खलःया स्वीस्वकःगु बुदिं तःजिक हनेज्या जुल। खलःया नायो धर्मशोभा तुलाधरजुया सभानायोसुई न्ह्याःगु ऊगु ज्याझ्वःलय् थी थी ब्यक्तित्वपिन्त हनेगु व सिरपाः लःल्हायेगु ज्या नं जूगु खः। सिरपाः लःल्हायेगु झ्वःलय् मञ्जुका स्मृति अक्षय कोषया “कमला लुमिन नेपालभाषा सिरपा”, थुगुसि नेपाया न्हापांम्ह मिसा न्यायाधिस मय्जु सत्यभामा माथेमाजु यात खलःया संरक्षक मय्जु सुबर्णकेशरी चित्रकारपाखें पलिगा न्ययेकाः, सभाय् विशेष उपस्थित जुयाद्युम्ह अतिकं हनेबहम्ह भाजु पञ्चबिर सिं तुलाधरजुपाखें हनापौ लः ल्हानाः हंगु खःसा दाता भाजु लुमिन कुमार श्रेष्टपाखें दांम्हिचा लः ल्हानाद्यूगु खः। उकथं हे नेपाल भाषा ख्यःया नां जाःम्ह आख्यानकार अले नेवाः न्ह्यलुवा भाजु मथुरा कृष्ण साय् मिजुं, थः निम्ह तिरीपिनि नामय् नीस्वना तःगु “रमा-कौशल्या लुमन्ति सिरपाः” नं लः ल्हायेगु ज्या जुल। स्वास्थ्य लागाय् अले मिसापिनिगु निम्ति समाजय् म्हितावयाच्वंगु भूमिकायात कदर यासे दँय् छम्ह अतः गायाः नर्स व डाक्टरयात बीगु क्वःछिनातः कथं वंगु निदँ तक कोरोनाया हुनिं लकडाउनं यानाः दिनाच्वंगु जुयाः वंगु दँ व थुगुसिया यानाः निम्हेसित बीगु झ्वलय् डा. चन्द्रहिरा कंसाकार व बरिष्ठ सिस्टर सानु केशरी तुलाधरपिन्त लःल्हाःगु खः। वय्कःपिन्तनं संरक्षकपाखें पलिगा न्ययेकेगु व विशेष पाहाँपाखें हनापौ लःल्हायेगु ज्या जूगु खः। दां-म्हिचा लः ल्हायेगु ज्याः धाःसा दाता भाजु मथुरा कृष्ण साय् मिया अनुस्पस्थितिई वय्कःया हे म्ह्याय् मय्जु लजना मानन्धरपाखें जुल। अथे हे ऊगु ज्याझ्वःलय् खलःया थजिपिं जः, प्रमिलादेबि बज्राचार्य, धर्मशोभा तुलाधर व ललितादेबि श्रेष्ठपिन्तनं हंगु खःसा खलः अवस्थित का.म.पा. १५ वडाया वडा अध्यक्ष ईश्वरमान डंगोल लगायतया सदस्य जनप्रतिनिधिपिं व नेवाःदेय् दबूया नायो भाजु पबित्र बज्राचार्यजुयात नं खेँय् सगं बियाः खलः पाखें भिंतुना देछाःगु खः। ज्याझ्वःलय् हनेबहःपिं ब्यक्तित्वपिन्सं थःथःगु नुगः खँ तःगु खःसा दाता भाजु लुमिन कुमार श्रेष्ठपाखें आकिवंनिसेंया सिरपाया नितिं अक्षय कोष स्वरूप निगु लख(रू.२,००,०००/-) या चेक खलःया नायो धर्मशोभा तुलाधरजुयात लः ल्हानादिल। अथे हे मिसा सम्बन्धि अनुसन्धान ज्याया लागि छगू लख व नीद्वः दां(रू.१,२०,०००/-) ब. सिस्टर सानुकेशरी तुलाधरपाखें थः मदुम्ह भौ, मय्‌जु एडना भेरुवेलया नामं नीस्वनेत लः ल्हानादिल।   
खलःया दांभरिं मय्जु पूर्णिमा शाक्यं न्ह्याकूगु ऊगु ज्याझ्वःलय्, मूपाहाँ कथं ब्वनातःम्ह भाजु मल्ल के. सुन्दरया म्हंमफया उपस्थित जुई मफुसां वय्कलं छ्वयाहःगु मन्तुनापौ निबर्तमान नायो मंगला कारंजितपाखें ब्वनाः न्यंकेगु जुल। सभाय् छ्याञ्जे मय्जु प्रेमहेरा तुलाधरजुं लशकुस यानाद्यूगु खःसा डान्स कल्चरल आर्ट सेन्टरपाखें हुलाप्याखँ नं लसकुश यायेकथं न्ह्यब्वःगु खः। अन्तय् सभानायोपाखें सुभाय् ब्यूसे सभा क्वचायेकेगु ज्या जूगु खः।