चुनाव पनि महँगो भएछ !

ब्यंग:                                                                            सुरेश किरण

नेकपा माओवादी केन्द्रका अध्यक्ष कमरेड प्रचण्डले जनयुद्ध ताका जम्मा पार्नुभएको आप्mनो ढुकुटी अहिले सुक्दै गएको चाल पाउनुभए जस्तो छ । अस्ति एउटा कार्यक्रममा बोल्नुहुँदै उहाँले भन्नुभएछ — अहिलेको चुनाव प्रणाली साह्रै महँगो छ, पैसा नहुनेले चुनाव लड्न गाह्रो छ ।
ढुकुटी सुक्दै गएपछि उहाँलाई चुनाव महँगो हुन थालेको याद भएछ । नभए त यस्तो चुनाव उहाँले कतिपटक लड्नुभएकै हो । तीन चारवटा चुनाव लडिसकेपछि बल्ला उहाँलाई थाहा भयो — चुनाव त महँगो रहेछ गाँठे !
पहिल ढुकुटी भरिभराउ थियो । महँगो याद भएन । अहिले ढुकुटी सुक्दै गएपछि महँगो महसुस हुन थालेछ । कमाल छ ।
कमरेड प्रचण्ड पर्नुभयो नेता । अझ ठूला नेता । नेताको ध्यान चुनाव बाहेक अर्को कहीं पनि पर्दैन भन्थे । हो रहेछ । त्यही भएर उहाँलाई चुनाव मात्रै महँगो भएको थाहा भयो । अर्को महँगो भएको थाहै भएन । देशमा चुनाव मात्र होइन खाद्यान्न पनि महँगो भइरहेको छ, तर प्रचण्डलाई थाहा छैन । देशमा पेट्रोल महँगो भइरहेको छ, शिक्षा महँगो भइरहेको छ, स्वास्थ्य महँगो भइरहेको छ । महँगीले जनता जिउन समेत नसक्ने अवस्थामा पुगिसकेको छ । तर कमरेड प्रचण्डलाई यति धेरै महँगीको ज्ञान भएन । चुनाव महँगो भएकोमा चिन्ता भइरह्यो ।
कमरेड, चुनाव महँगो भएर जनतालाई केही फरक पर्छ ? जनतालाई परेको महँगीमा ध्यान खोइ ?

(जनआस्था साप्ताहिकबाट)