मरु सत: चाल

यें /यें देय्‌या न्हाय् कथं धस्वानाच्वंगु ऐतिहासिक सम्पदा मरुसत: अर्थात काष्ठमण्डप दयेकेज्या पूवंसेलिं सकसियां नितिं चायेकुगु दु । २०७२ साल बैशाख १२ गतेया तःभुखाचं पूणर्रुपं क्षति जूगु मरुसत:या पुनःनिर्माण क्वचायेकाः  राष्ट्रपति विद्यादेवी भण्डारीया ल्हाःतं ऐतिहासिक मरुसतःया लोकार्पण चैत २१ गते जूगु खः ।                ज्याझ्वलय्  मरु सतःया ताःचा प्रदेश सांसद एवं काष्ठमण्डप पुन:निर्माण समितिया नायो राजेश शाक्यं येया मेयर विद्यासुन्दर शाक्ययात लःल्हानादीगु खः । थ:म्हं का:गु ताःचा येँ महानगरपालिकाया मेयर विद्यासुुन्दर शाक्यं राष्ट्रपति भण्डारीयात लःल्हानादीगु खः । मरुसतः पुनःनिर्माण क्वचायेका: आः मरुसतः सर्वसाधारणया नितिं खुल्ला याःगु दु ।
उगु ज्याझ्वलय् राष्टपति भण्डारीं सम्वोधन यायगु झ्वलय् आन्तरिक व वाह्य पर्यटकपिन्त आकर्षण यायत थुज्वःगु ऐतिहासिक सम्पदां महत्वपूर्ण  भूमिका म्हितीगु जूगुलिं थुकिया संरक्षण यायगु फुक्कसिगु दायित्व जूगु खँ न्ह्यथनादीगु दु । राष्ट्रपति भण्डारीं लिपांगु अध्ययनपाखें वःगु मरुसतः विषयया न्हूगु तथ्ययात आत्मसात् यासें नेपाः दुने दूगु ज्ञान व सीपप्रति गौरवबोध यायेमा:गु खँ नं धाःगु दु । राष्ट्रपति भण्डारीपाखें ज्याझ्वलय् मरुसतःया शिलापत्र नं उलेज्या यानादीगु खःसा मरुसतःया नं अबलोकन यानादीगु खः ।
ज्याझ्वलय् पुनःनिर्माण ज्या व सम्पदा संरक्षणय् योगदान बियादीपिं व्यक्तित्वपिन्त हनेज्या नं याःगु खः । वयकःपिं प्रा. डा प्रेमनाथ मास्के, प्रा.डा. सुदर्शन राज तिवारी, कोश प्रसाद आचार्य, काई वाइजे, यज्ञमानपति बज्राचार्य, पद्म सुन्दर जोशी, कुलभक्त शाक्य, अरुणा नकर्मी, मा. राजेन्द्र महतो, विश्व राज ओली, चन्द्रमान डंगोल, मणिन्द्र श्रेष्ठ, एनी जोशी, विनिता मगैया, अमृत राजा शाक्य, कमल मैनाली, सुमन सिं, रविन कनिंघम, ईयान सिम्पसन, लक्ष्मी भक्त राजचल व तुलसी प्रसाद माखास्यापिन्त मेयर विद्यासुन्दर शाक्यं स्वांमा क्वखायका व राष्टपतिपाखें हनापौ देछाया हनेज्या याःगु खः ।
उगु ज्याझ्वलय् मरुसतः पुनःनिर्माण समितिया नायः लिसें प्रदेशसभा दुजः राजेश शाक्य, मेयर विद्यासुन्दर शाक्य, प्रा. डा. प्रेमनाथ मास्के, विज्ञ समूहपाखैं अरुणा नकःमि, पुरातत्व विभागया महानिर्देशक दामोदर गौतमं लगायतपिन्सं मरुसतःया थीथी पक्षयात कःघाना थःगु नुगः खँ तयादीगु खः ।
ज्याझ्व: काष्ठमण्डप  पुनः निर्माण समितिया छ्याञ्जे गौतम डंगोलं न्ह्याकूगु  ख: । ज्याझ्वलय् बागमती प्रदेश सभाया सभापति सानुकुमार श्रेष्ठ लगायत राजनीतिक दलया नेतातयगु् नं उपस्थिति दुगु ख: । (समाचार ग्वाहालि: सुगत रत्न सिन्दुराकार)