तान्द्रा !!

मथुरा साय्‌मि

मनय् खॅ ल्हानाच्वन — थ्व ओमिक्रोन धाःगु न्हूगु कोरोना भाइरसं नेपालय् नं तसकं हाहाकार मचय् याःवल । संक्रमितत झनझन उप्वयावल । झिद्वः थ्यन , झिंछद्वः थ्यन , अले झिंनिद्वलं नं मयाक मनूत छन्हुया दुने ल्वचं कल । सरकारया तथ्यांकय् दुमथ्याःपिं ल्वगित मेपिं गुलि दनि गुलि । थःथःगु हे छेय् च्वनाः ल्वय् लंकेगु कुतः यानाच्वन । गुलि गुलि ।

सीपिं उलि उप्वः खने मदुसां ल्वचंकःगु परिवारया छेजःपिं वाथावाथा कनाच्वन । थुरूथुरू खानाच्वन । धिबा मुने मफइ धयागु पीरं सरकारं नं लक डाउन मयासे च्वंच्वन । मनूतसें पसः मचायेकुसे च्वने मफु । कर्मचारीत अफिस मवंसे मगाः । मछिं । कात्तुकाः । थ्व ला खने दयक , खने मदयक हांनिसें भ्वाबः कनाच्वंगु ई वल । गबले भुगुभुगु क्वःदलावनी मनूत …!!

ग्यासें वल– भारतय् थे छन्हुया हे स्वंगूस्वंगू लाखं मयाक मनूयात थियाब्यूसा छु याये ? द्वलंद्वः सिनावंसा छु याये ? थौ थन नं ल्वचंकःपिं गुलि थ्यन थे ? आः सरकारं तुरन्त छु पलाः ल्ह्वनेतेन ? सीके मास्तेवल ।

समाचारया ई जुल । मोबाइल चायेका ।मनय् तान्द्रै तान्द्रा ।

समाचारय् बुखॅ धकाः बियाच्वन — सर्वदलीय बैठक च्वनेगु …।चुनाव यायेगु …। सहलह ब्याकेगु …। स्वंगुलिं हे तहया चुनाव छकलं यायेगु कि मयायेगु !! ? !!
!!!!!!