क्रोसिन र सपनाहरू

उसले क्रुसेन र चियासँगै टेबुलमा राख्दै भनिन् ,”तपाईंलाई यो पक्कै मनपर्छ होला !”

मैले यसो हेरें क्रुसेनलाई “के हो यो मैले त पहिले खाएको छैन । यो त प्राउन जस्तो छ । “

– “क्रोसिन हो यो मलाई मीठो लाग्छ ! मलाई थाहा छ तपाईं मन पराउनु हुन्छ यसलाई ।” उसमा विश्वास थियो मलाई क्रोसिन मनपर्छ भन्ने ।

चियाको चुस्कीसँगै क्रुसेन पनि खान थालें मीठो लाग्यो साँच्चिकै ।

मैले भनें ,”मीठो रहेछ “।

“खानुस् न अर्को पिस पनि” मायालु स्वरमा भन्दै अर्को पिस मेरो मुखमै राखिदिइन् र मसँगै मेच तानेर बसिन् ।

उसमा सन्तोषको भाव देखिन्थ्यो ।

पहिलोपटक घरमै पाहुना बनाएकी तिनको यो क्रोसिन अनि चिया ।

त्यसपछि उनको नजीकपनले मनमा मेरो तन मनमा पनि उर्जा थपिएको आभास भयो ।

तिनी सुन्दर छिन् । तिनको सुन्दरताको चर्चा परपरसम्म फैलिएको थियो ।

तर आज तिनले मलाई आफ्नो घरमा विशेष अतिथि बनाएकी छिन् ।

हुन त हाम्रो यो पहिचान पुरानो नैं हो । तर त्यति खास नजीक थिएन । झन् लामो समयको ग्यापका कारण खास कुनै सम्बन्ध नै थिएन भन्दा फरक नपर्ला । तर एक कार्यक्रममा भएको भेट नैं हाम्रो पुनर्भेट बन्यो ।

त्यो भेटपछि तिनले मेरो लागि विशेष स्थान दिइन् ।

हुन त त्यो स्थान मेरो लागि पाच्य भने थिएन । तर मपनि विस्तारै त्यो स्थान स्वीकार गर्ने ठाउँमा पुगें ।

चिया र क्रुसेनको कथा दिनदिनै कोरिंदैं जान थाले ।

मलाई क्रुसेन झन् झन् मीठो लाग्न थाल्यो ।

उसको नजीकपन त यति बढ्न थाल्यो दुरी भनेकै बाकी रहेन ।

हरेक दिनको रुटिन नैं बन्यो एक समय क्रुसेन र चियाको चुस्कीसँग तिनको न्यानोपनको आभास गर्ने ।

रमाइलो , तिनलाई अझ रमाइलो ।

समय

क्रुसेन र चियाको चुस्कीका मीठा पलका घट्नाक्रममा रमाउँदै गर्दा एकदिन घरमुनि पुगेको बेला अचम्मको दृश्य देखें ।

एक भद्रपुरुष क्रुसेको प्याकेट बोकेर तिनको मूल ढोका अगाडि बसेर भन्दै थिए “मैंया तिमीलाई मनपर्ने क्रोसिन ल्याइदिएको छु ! ढोका खोल्नु त फेरि आज मेरो फर्कनुपर्ने पनि छ । फ्लाइटको टाइम हुन लाग्यो ।”

म अक्क न बक्क भएँ ।क्रोसिन र चियासँगै देखेको सपना ! अनायास धमिलो हुँदै गएको भान भयो ।

म फनक्क घुमेर फर्कन खोजें । तिनले झ्यालबाट आशलाग्दो आँखाले हेरिन् ।

मैले फर्केर फेरि हेरिन ।