लुमंलुमं ….. !! (छपु आत्मपरक च्वसु)

मथुरा साय्‌मि

असं दुवातय् थ्यन । उखे वनेला थुखे वनेला । वंघःपाखे हे पलाः घुसुहुॅ न्ह्यात । जॅ स्यागुलिं भचाभचा धुसि लुइमाः। फक्व छुं म्वाम्ह थे धस्वानाः वनाच्वना । उ का बनिया पसः नं थ्यॅ हे थ्यन । स्टूल मेचचाय् पुचिं फ्यतूवना ।

” धेदिसॅ, छु माल छितः? ” पसल्यां न्यन ।
” ग्व, छु माल धायेगु । जॅ स्यानाः धुसिधुसि लुया जुइमाः । देशी वासः नतले जक …। मेगु स्वया झी जडिबुतिया वासः हे छकः पाना स्वयेला धै थे जुयाच्वन । उमेर वनकि नं थ्व जू व जू धैगु हे मदु । मेगु स्वया थ्व जॅ स्यागु झन मज्यू जितःला । गनं पिहाॅ छकः जुइ मालकि कःका चबूगु भुतिमालि थे ।”

थपायहाकःगु जिगु खॅ पसल्या भाजुं न्यनांच्वन । पसलय् मेपिं गाहात नं मवयाच्वंगु ई । वं जितः क्वथीक छकः स्वया लिक्कसंच्वंगु दराजचाय् छगःनिगः सिसिचा चीका छगः वासः सिसि पिकाल ।

थ्व पायेगु हे वासः खः । ल्हाः, तुति, जॅ स्याःस्याःथाय् पायेज्यू । मेगु स्वया थ्व जिउ । बाःछियात गाइ । चब्बुक मलासा मेगु छगः पायेमाली । ” पसल्यां वासः सिसि जिगु ल्हाती ज्वंकल ।

थयक स्वया । Ostoflek oil च्वयातःगु दु । खःला मखुला । चब्बुक लायावंसा रामबाण हे जुल । मजूसां स्यागु जक लंसां , न्यासे जक जुइ फयावंसां गातनि । थुकिं हे जियावनी ला छू छु ।

वासःसिसि छगः ज्वना हे वया ।

चिकुलाया ई ।निभाः मत्वयकं दने थाकु । हिटर च्याके मायक हे चिकुल । चिकु धका कयकुना च्वनकि झन चिकु । फुर्ति याना जुइ धाःसां मबिल । आः तुतां मचुसे जुइ फैम्ह मखुत जि । मन क्वतुन ।

सुथय् निभाः त्वयवं वासःसिसि ज्वना कःसी वना । लासाचा छपाः लाया । छकः थस्सःपाया ग्वतुला । भचा याउसे च्वं थे च्वन । म्ह भचा क्वना वयव ख्वातुवसः त्वःताछ्वया । जॅ पाना । वासः छकः बांलाक संका । पुसा लिकया । वासः भचा ल्हाःपाय् प्वंका । मछिं । थम्हं तुं जॅय् वासः पाये भचा छिॅ हे मछिं । ल्हाःपायच्वंगु वासः स्वयांच्वना ।
× × ×

” बिन्ति धाये कारे …”

वं जिगु खॅय् वास्ता मतः । थःगु सुज्या यानांच्वन । वं वासः छकः पाना बीला धका कःसी निभालय् वयात खुसामद याना च्वनागु । वं न नि हे मवाः ।

जिं हानं हेका ,” मछिनाः धैगु नि । ल्हाःतुती बुका ब्यु धैगु मदु । जॅय् न्ह्याय् मदया मखा । का रे प्लीज । ”

वं जिगु जॅय् छकः स्वत । वासः सिसिचा छकः स्वत । हानं थःगु हे ज्याय् तक्यन ।

” छितः न्ह्याबलें वासः बुकाच्वने मलाः जि । न्ह्याःला काः व । घच्याइपुम्ह बुरा …” बल्ल नवाना हल वं ।

” न्ह्याबलें न्ह्याबलें मफु छि । कि चिकं जक बुकीम्ह छम्ह लह्यु । उखे छेय् मचा बूम्हसित चिकं बुकःवैम्ह बुरि छम्ह दु । वैत हे सःता बीला ?” धाधां वं मुलुसुका त्वःतल । वासः कया जिगु जॅ छपातं पानाबिल । जि सुंक च्वना ।
वं वासः पापां म्हुतु नं न्यायेका हल , ” छि न्ह्याबलें जॅ स्याः। कि छकः क्यं हे झासॅ …।”

” छकः क्वात्तुक बुका ब्यु रे । छु वास्यावास्या जक सनाच्वनाउ ” जिं लुमदंपहः क्यना ।

” का , गात । सिधल । मफु जि ” वं सिसी पुसा तयाछ्वत । सिधलं यानाछ्वत ।

” का, म्वाल सा म्वाल । छकः आम अथःप्यं छगः दिका ब्यु रे पलख । स्यागु भचा क्वलाइ ।”

वं धयाहल, ” म्हाः जि फ्यतुइफातुइ । क्वॅय् त्वधुली छिउ ….”

× × ×

…… ल्हापाय् वासःचिकं स्वस्वं कू नयाच्वनाम्ह च्वनां । याकःचा । चिकं तिकितिकि ननाः वानावन । लुलंलुमं जि गनगन तन ।
………… !!!