च्यूता ! – समसामयिक च्वसू

रिता महर्जन

झी नेवा: समाज गनथाय् वना: स्यनाच्वन धैगु स्वयेगु खःसा बांलाक सी दु, नेवा: समाजदुने थ: मस्तय्‌त बांलाक थ:गु रितिथिति, नख:चख: व सम्पदाया बारे थुइका बी मफुगु हुनिं भविष्यया कर्णधार धाइपिं मस्तय्‌सं झीगु तजिलजि बारे छुं थुइके मफुत ।
झीगु नेवा: समाजदुने न्यय्‌दँ न्ह्य: तक्क नं आख: ब्वंकेगु चलन मदुनि । जब आख: ब्वंकेगु चलन वल उबलय् नं जेनतेन याना: च्यागू तगिं तक्क जक आख: ब्वंकेगु यात। आपाः ब्वंकेगु धैगु झिगू तगिं तक्क जक ख: । अन‌ लिपा मस्तय्‌त ब्याहाः याना: थ:गु छेँया न्ह्याना वयाच्वंगु लजगा: न्ह्याकाः गुहालि यानाः जिविका हनेगु जुइ । यक्व मस्त मचांनिसें तसकं आख: ब्वनेसःसां लिपा जूलिसे छेँया जिम्मेवारी बहन यायेमा:गु अवस्थां यानाः भविष्यय् छुं बांलाःगु लजगा: ज्वनेगु अथवा सरकारी ज्या मयासे थ:गु पुर्खौली बुँ मियाः व:गु ध्यबां छेँ दनाः उकी बालं तयाः नयेगु अथवा अमेरिका व मेमेगु देय् वना: अन हे settle जुइगु । थ्व झी नेवातय्‌गु तःधंगु गल्ति हे ख: धाःसां छुं मपा: थें च्वं ।
मेगु खँ– खय्, ब्रम्हूत थाहां वैच्वंगु अले थ्व देय् व झीगु थासय् इपिं हावि जुया वयाच्वंगु । इमित थकायेत झी नेवाःतय्‌गु हे ल्हा: दु, मखु ला ? गनथाय् झी नेवा:तय्‌सं इमित हे बुँ मियाः व:गु ध्यबां झीसं छेँ दनाः इमित हे बालं बिया । बालं बियाः व:गु इमिगु ध्यबां झीसं थ:गु जिविका हनाच्वना । तर इमिसं थ:गु गामं SLC तक्क तसकं थाकुक आख: ब्वना: लिपा उच्च अध्ययनया लागि येँ देसय् वयाः नं झी नेवा:तय्‌गु छेँय् बालं च्वना: तसकं संघर्ष याना: सरकारी ज्याय् नां पिकयाः सरकारी ज्याय् इमिसं कब्जा यात ।
थथे छम्ह जक मखु लखौं लख पिनें गामं मनूत थन येँ देसय् दुहां वल। नेवाःतय्‌गु बुँ न्यात । आ: ला त्वा: त्वालय् नं पुलांगु छेँ न्याना हयेधुंकल ।
थौं झी नेवाःतय्‌गु अस्तित्व माला च्वनेमाःगु जुइधुंकल । पिने अमेरिका व मेमेगु देसय् च्वनाः झी नेवा:या पहिचान माला: च्वनेमाल। झी थ:गु नेवा: संस्कृति, भाय् व पहिचान पिनें कत: देसय् च्वना: माला: च्वनेमाल । थ्व विडम्बनाया खँ ख:। गनं मेगु पुस्ताय् झी नेवा: अस्तित्व हे ला मदया वनीगु ला मखु ला??? च्यूताःया खँ थ्व हे ख: ।